Shqipëria

Integrimi i Shqipërisë në BE do të jetë rekord, falë Mira Muratit dhe Inteligjencës Artificiale


Paramendoni qindra mijëra faqe legjislacion, mijëra ligje të mirëfillta, për të përafruar spektrin ligjor me Bashkimin Evropian – punë që Shqipëria duhet të nisë ta bëjë në procesin negociues me hapjen e kapitujve.

Do të duheshin vite, qindra ekspertë të angazhuar, dhjetëra konsulentë të jashtëm, kur në shumë vite që puna ka filluar, në Tirana janë arritur të kalojnë vetëm 15% e totalit të ligjeve që duhen përafruar me BE-në.

Por, paramendoni edhe një mënyrë më të thjeshtë për ta arritur këtë…pasi ka.

Ndriçimi i një gjeniu në botën e Inteligjencës Artificiale, përkoi të ishte nga Shqipëria.

Mira Murati, është ndër zërat kryesorë në kompaninë OpenAI, e cila u bë themelore në rrugëtimin e pakthyeshëm të botës drejt universit subdigjital dhe botës së AI, me chatbotin ChatGPT.

Një rastësi e madhe për një vend të vogël dhe një bisedë, që në fakt mund të ndryshojë të gjithë rrugëtimin evropian të Tiranës.

E bën me dije vetë kryeministri, Edi Rama, gjatë fjalës së tij në Kongresin e Partisë Socialiste, kur tregon për një bisedë me Mira Muratin.

“E kërkoj Mira Muratin i ndrojtur. nga një drojë që nuk më karakterizon. Pas një komunikimi telefonik, i kërkoj ndihmë për ta bërë gati më shpejt Shqipërinë për anëtarësimin evropian”, tregon ai, duke bërë të qartë edhe nënqeshjen që kishte marrë nga ana tjetër e Atlantikut, por duke e dëgjuar.

Rama e pyet Muratin nëse në vend që Shqipëria të rekrutojë një armatë me përkthyes, apo një batalion me juristë, në vend që të shpenzohen miliona euro për të bërë gati në shqip malin me masat ligjore të BE-së, ta bëjë këtë ChatGPT.

Një përgjigje e menduar, e përpunuar, por e bindur i vjen në fund: Më duket e mundur!

“Kështu nisi puna me Mirën dhe një skuadër të përbashkët”, vijon të tregojë Rama, “dhe sot dua ta ndaj me ju që në 13 dhjetor në Bruksel, kur të mbaroj mbledhja bashkë me dilemën greke, do ua lë si kartolinë të Vitit të Ri të Shqipërisë të gjithë liderëve të BE-së rezultatin e testit të suksesshëm të modelit shqiptar, për ndërvendosjen në legjislacionin tonë të 280 mijë faqeve masa ligjore të BE”.

Por nuk ndalet këtu. Shkon edhe përtej.

“Do ta ndihmojmë edhe Kosovën”, thotë, “bujarisht, edhe pse nuk është ende vend kandidat”.

Kështu, Rama përshkruan një rrugë, e cila pritet të jetë shumëfish më e shpejtë se sa vendi më i shpejtë që është anëtarësuar ndonjëherë në BE.

Një model shqiptar i anëtarësimit të shpejtë, i dhënë në tryezë gati për të gjithë vendet e BE-së, por edhe për vendet kandidate dhe atyre aspirante.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com

Lajmet kryesore