Inceneratori i Tiranës me ‘fatin’ e dy të tjerëve, SPAK nis arrestimet në bashkinë kryeqytetase

Prokuroria e Posaçme SPAK ka lëshuar në tërë 15 urdhër-arreste, për çështjen e lidhur me Inceneratorin e Tiranës, i cili nga sa duket, do të ketë të njëjtin fat me atë të Elbasanit dhe Fierit, ku një sërë zyrtarësh të lartë dhe ish-zyrtarësh, janë dënuar me burg.

Siç ka mësuar Albanian Post, një sërë funksionarësh në Bashkinë Tiranë kanë rënë tashmë në pranga pas urdhrave nga SPAK, mes të cilëve edhe drejtues, apo ish-drejtues, në institucionin më të madh të qeverisjes vendore në Shqipëri.

Ndër emrat, spikat ai i drejtorit të përgjithshëm të punëve publike në Bashkinë Tiranë, Taulant Tusha.

Po ashtu, janë arrestuar edhe Namik Simixhiu, Bledar Karoli dhe Jetmir Llapaj.

Ndërkohë është shpallur në kërkim Erjon Murataj, i cili mësohet se ndodhet jashtë  vendit.

Po ashtu, masa janë vendosur edhe ndaj ish-ministrit të Mjedisit, Lefter Koka dhe ish-deputetit socialist, Alqi Bllako, të cilët gjenden të dy të burgosur, pasi janë dënuar më parë për rastet e inceneratorëve të Fierit dhe Elbasanit.

Ndërkaq, në arrest shtëpie janë vendosur Alba Thoma, Valbona Ballgjini, Sidita Kopliku, Etleva Kondi dhe Sidita Tola.

Operacioni i SPAK ende po vijon dhe detaje të tjera pritet të bëhen publike.

Më 10 gusht, u mësua se Inceneratori do të menaxhohet nga Agjencia e Administrimit të Pasurive të Sekuestruara dhe Konfiskuara (AAPSK), në Ministrinë e Brendshme.

Kështu bëri të ditur në një konferencë para mediave, administratori i ri i impiantit Arjan Baçi, duke cituar vendimin e gjykatës.

“Gjykata ka vendosur që për menaxhimin e kësaj shoqërie të merret Agjencia e Administrimit të Pasurive të Sekuestruara dhe administrator jam zgjedhur unë nën varësinë e Ministrisë së Brendshme”, deklaroi fillimisht zyrtari shqiptar.

Sipas tij, bashkitë e Qarkut të Tiranës janë debitore dhe do të dërgohen shkresa ku do të kërkohet që të zbatojnë kontratat.

Teksa, SPAK-u, ka argumentuar se ka baza të forta hetimore, për të përfunduar se kompania e inceneratorëve “Integrated Energy B.V. S.P.V.” kishte si pronarë “de facto” shtetasit Klodian Zoto dhe Mirel Mërtiri, të cilët ndodhen në arrati.

Faktet

Nga provat e marra gjatë hetimit ka rezultuar se, Zoto dhe Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k.

Për SPAK-un, është evidentuar fakti se Zoto dhe Mërtiri, janë personat që kanë udhëzuar dhe kanë marrë vendimet në lidhje me shoqërinë koncesionare “Integrated Energy B.V SPV” dhe shoqërinë mëmë në Holandë me emrin e mëparshëm “Integrated Energy B.V.”, aktualisht “Geogenix B.V.”, që përkon nga momenti i themelimit të këtyre shoqërive e në vijimësi.

Më pas shkruhet se Zoto, në bashkëpunim me Mërtirin kanë përfituar në sajë të faturave tatimore të falsifikuara, vlerën monetare 409 milionë e 42 mijë lekë.

Zoto është paraqitur dhe ka deklaruar fatura të falsifikuara për punime të kryera nëpërmjet shoqërisë tjetër të tij.

Në kohën e lëshimit të këtyre faturave të falsifikuara, provohet se aksionerë “de facto” kanë qenë ata të dy.

Po ashtu, është evidentuar fakti se Zoto dhe Mërtiri zotërojnë në mënyrë indirekte shoqërinë “F.M.O.” sh.p.k.

Nga hetimi janë mbledhur prova se këta shtetas, duke shfrytëzuar përfitimet e paligjshme kanë blerë për llogari të subjektit “F.M.O.” sh.p.k., një pasuri të paluajtshme, me sipërfaqe 611 m2, me vlerë 1 milion euro e ndodhur në qytetin e Durrësit, e cila është sekuestruar.

Ndërtimi i situatës

Prokuroria e Posaçme do të niste më 5 korrik të vitit të kaluar verifikimet pas denoncimit të ish-kryetares së Lëvizjes Socialiste për Integrim (tani Partia e Lirisë – ed.), Monika Kryemadhi, e cila tha se 24 kompani kishin kryer 189 milionë dollarë evazion fiskal të lidhura me inceneratorët.

Kryemadhi vërejti asokohe se këto 24 kompani janë të lidhura me njëra–tjetrën dhe dyshohet se kanë kryer evazion fiskal me shtetasin Klodian Zoto, emri i të cilit lakohej me çështjen e inceneratorëve.

“Ka blerje korruptive, të ndara në fatura të vogla, nuk blihet në llogari bankare që lëvizja financiare mos bëhet me llogari bankare, por cash, e shitja nga fruta ekzotike në beton është bërë me pagesë bankare, por pagesat bankare nuk janë kryer. Përveçse pagesat nuk kryhen, kompanitë që kanë bërë blerje marrin dhe rimbursimin e TVSH-së”, shprehej ajo.

Më 31 janar të vitit 2023, deputetja e Partisë së Lirisë, Monika Kryemadhi do të thirrej në ambientet e SPAK-ut, për të dëshmuar për inceneratorin e Tiranës.

Deputetja opozitare do të jepte dëshminë e saj para hetuesve të Byrosë Kombëtare të Hetimeve (BKH).

Në një deklaratë për mediat, Kryemadhi deklaronte se “gjërat tani po zbardhen dhe shpresoj që më e pakta është që të ndalet pagesa për inceneratorin”.

Kryemadhi shtoi se “Landifilli i Sharrës duhet të ishte mbyllur brenda 22 muajve, ndërkohë që në nëntor është rihapur duke depozituar mbetjet”.

“Do të dorëzoj dokumente të tjera në lidhje me këtë. E di që është e vështirë por kam besim të plotë se gjërat do të bëhen. Drejtësia të triumfojë për qytetarët shqiptarë që paguajnë një kompani ‘ofshore’ e cila grabit 29 euro për ton mbetje. Kjo është një kontratë që vazhdon për 30 vite, ndryshe nga Elbasani dhe Fieri. Pra ne vazhdojmë e paguajmë edhe pse nuk incenerohet, nuk diferencohen mbetjet. Ka dokumente të tjera, ka fakte të tjera”, ravijëzonte ajo.

Lidhur me pagesat që vazhdojnë të lëvrohen për këtë incenerator, ministrja e Financave dhe Ekonomisë, Delina Ibrahimaj, deklaroi gjatë seancës së fundit plenare se ato nuk paguhen nga buxheti i shtetit por nga Bashkia e Tiranës.

“Do doja vetëm një sqarim për opinionin publik, pasi në mënyrë të përsëritur deformohet opinioni publik për çfarë bën qeveria dhe çfarë veprime merr. Nuk paguhet asnjë para nga buxheti i shtetit për impiantet e mbetjeve të Elbasanit, të Fierit, ndërsa për impiantin e Tiranës është një fond në buxhetin e shtetit prej 200 milionë lekësh i cili është një fond kontigjence në rast të paaftësisë paguese të Bashkisë së Tiranës”, theksoi zyrtarja shqiptare.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.