I mbijetuari i tërmetit, Mustafa Gönülal, për Albanian Post: “Javën e parë kisha ndjenjën që po lëkundesha gjatë gjithë kohës”

Tërmetit të parë dhe të dytit i mbijetoi. Bashkë me familje.

Mustafa Uğur Gönülal, i cili deri para dridhjeve të fuqishme të tokës më gjashtë shkurt jetonte në Malatia, akoma ka frikë se lëvizjet e herëpashershme të tokës mund t’ia rrezikojnë jetën atij dhe familjes.

Si 26 vjeçar, ai jeton me nënën dhe babanë pensionist, familja e vetme me prejardhje shqiptare në Malatia. Frikën që e përjetoi në tërmetin e parë, thotë se nuk mund ta heq nga mendja.

“Kisha shumë frikë, një ndjesi shumë e frikshme. Në atë moment ne ishim duke fjetur, papritur u zgjuam, as vetë nuk e kuptoj se si, por bashkë me mamanë dhe babin dolëm jashtë duke vrapuar. Bënte ftohtë dhe menduam se të futeshim në makinë do të mbroheshim paksa”, rrëfen Gonulal në një intervistë për Albanian Post.

“Teksa po dilnim, të frikësuar e tmerruar vetë, sepse nuk po e kuptonim se çfarë po ndodhte, shihnim të gjithë duke vrapuar, duke qarë e bërtitur. Të gjithë mundoheshin të shpëtonin veten në njëfarë forme”, përshkruan ai momentin kritik të tërmetit, i cili goditi Turqinë dhe Sirinë mëngjesin e gjashtë shkurtit duke lënë me mijëra njerëz të vdekur, e mijëra shtëpi e ndërtesa të shkatërruara. Tërmet ky të cilin sizmologët e cilësuan si më vdekjeprurësin e kësaj dekade.

Në veturë qëndruan gjithë ditën. Meqë nuk kishin zgjidhje tjetër aty edhe fjetën një natë pas tërmetit.

Të nesërmen në mëngjes Gonulal tregon se arritën të dilnin nga qyteti dhe të strehoheshin tek disa kushërinj të cilit jetonin në qytetin Eskishehir.

Por, edhe pse u largua nga ai vend i frikshëm, frika qëndroi me të edhe për një kohë më të gjatë.

“Javën e parë kisha ndjenjën që po lëkundesha gjatë gjithë kohës. Isha jo stabil, isha i frikësuar, por tani avash avash ato ndjesi po kalojnë”, thotë ai duke treguar se për dallim nga tërmeti i parë që e përjetoi shumë rëndë, të dytin i cili ndodhi në mesditë, ishte më i përgatitur emocionalisht.

“Rreth e rrotull meje të gjithë janë mirë, familja ime është mirë, shpëtuam, të gjithë ne jemi mirë”.

Të prekurit e tërmetit, qeveria turke i ka ndihmuar me mjete financiare, e komunat me veshmbathje e ushqime.

“Nga ana e shtetit na janë dhënë rreth 10 mijë Lira (rreth 500 euro) për familje, ndërsa në vendin ku po jetojmë, prefektura ka ndarë veshmbathje dhe ushqime, por duke qenë se ne po jetojmë me familjarë dhe nuk kemi nevojë, vendosëm të mos i marrim, le ti marrin ata të cilët kanë më shumë nevojë për to, se ne”.

Ndihmë, thotë të kenë pranuar edhe nga ekipet e kërkim-shpëtimit shqiptare.

“Në Malatia ka ardhur një ekip nga Shqipëria e Kosova. Ata kanë bërë çdo gjë që ishte e mundur për të na ndihmuar. Ne të frikësuar e të stresuar nuk mund të ndihmonim as veten, si viktima, e jo më dikë tjetër”, vazhdon rrëfimin Mustafa.

“Ne mendojmë të kthehemi në Malatia”, tregon ai, “por nuk është në dorën tonë dhe nuk e dimë kur do të kthehemi sepse nuk jemi të sigurt të kthehemi në shtëpi. Sipas kontrollit që ka bërë shteti, shtëpia ime është akoma e banueshme, por ne nuk jemi të sigurt të kthehemi aty”.

Mustafa që ka lindur e jeton në Turqi, origjinën thotë se e ka nga qyteti i Ferizajt në Kosovë.

“Pas një hulumtimi që bëra, për gati dhjetë vjet, unë kam arritur të gjej kushërinjtë e mi nga ana e babait, në Ferizaj. Pastaj kemi vënë kontakt dhe kemi biseduar, ndërsa në vitin 2016 isha atje për vizitë”, rrëfen ai.

Pas tërmetit, Mustafai tregon se pranoi shumë telefonata e mesazhe nga kushërinjtë në Ferizaj, të shqetësuar për të ditur për shëndetin e tyre.

Dy javë pas këtij tërmeti, të hënën e 20 shkurtit rajoni kufitar ndërmjet Turqisë e Sirisë u godit nga një tërmet tjetër.

Tërmeti i së hënës, këtë herë 6.3 shkallë i Rihterit, ka pasur epiqendër qytetin jugor turk, Antakia dhe është ndier në Siri, Egjipt dhe Liban.

E gjitha vjen pikërisht një ditë pasi grupet e kërkim-shpëtimit e përmbyllën punën e tyre dy-javore, për gjetjen e të mbijetuarve.

Ndërsa, sipas një njoftimi nga Emergjencat Civile turke, dhjetëra godina të tjera, shumica prej të cilave në Antakya, janë shembur krejtësisht, pasi kishin pësuar dëme nga tërmetet e para.

Në bazë të raportimeve, lëkundjet kanë qenë aq të fuqishme, sa janë ndjerë deri në ishullin e Qipros, Liban dhe Izrael.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.