Mashtruan qytetarët për kontrata të punës në Irak, Afganistan dhe Poloni, Prokuroria ngre aktakuzë

Prokuroria Themelore në Ferizaj ka ngritur aktakuzë ndaj tre personave për “mashtrim” dhe ndihmë në kryerjen e kësaj vepre penale.

Lajmi është bërë i ditur nëpërmjet një komunikate për media, ku njoftohet se të dyshuarit kanë premtuar se do të sigurojnë kontrata të punës në Irak, Afganistan dhe në Poloni.

“Gjatë periudhës kohore 2020-2022, i pandehuri N.L., në vazhdim me dashje dhe me qëllim të përfitimit të kundërligjshëm pasuror përvete me anë të paraqitjes së rreme të fakteve i detyron të dëmtuarit të veprojnë në dëm të pasurisë së tyre”, thuhet në komunikatë.

Sipas njoftimit, i pandehuri për sigurimin e këtyre kontratave të punës u kërkonte viktimave të holla në vlerë prej 3 mijë deri në 6 mijë euro, ku dëmi total arrin shumën rreth 80 mijë euro.

Njësoj dyshohet se ka vepruar edhe i pandehuri K.H.

“Për sigurimin e këtyre kontratave të punës, u kërkojnë shuma të të hollave në vlera nga 3000 mijë deri në 6000 mijë euro, ashtu që të dëmtuarit u dorëzojnë qoftë me para të gatshme apo përmes transfereve bankare, të cilat të holla pastaj i ndajnë së bashku dhe pavarësisht që të dëmtuarit presin me muaj të tërë, kontratat e punës nuk arrijnë t’i sigurojnë asnjëherë si dhe të hollat nuk ua kthejnë”, thuhet në njoftim.

Ndërkaq, e pandehura K.L, potencohet se me dashje ka ndihmuar të pandehurin N.L, bashkëshortin e saj, për kryerjen e veprës penale “mashtrimi”.

“Deri sa ky i fundit nuk gjendej në Kosovë, e njëjta takohej me disa nga të dëmtuarit dhe nga të njëjtit pranon shuma të të hollave në vlera nga 3000 mijë deri në 6000 mijë euro, e pastaj këto shuma të të hollave ose i deponon në llogarinë bankare të të pandehurit N.L., ose ia transferon përmes “Western Union”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.