Shqipëria

I gjatë, i pashëm, atletik, komunist jo për ideale – Si e përshkruante raporti sekret i CIA-s Enver Hoxhën dhe enturazhin e tij?


Ende pa e pasur kontrollin e plotë të shtetit, por në hapat e duhur drejt marrjes së kontrollit të çdo freni të strukturës shtetërore në Shqipëri, Enver Hoxha dhe enturazhi i tij ishin në radarin e Agjencisë Qendrore të Inteligjencës amerikane (CIA), e cila kishte mbledhur informacione të mjaftueshme prej të gjithëve, për të parë skenarët e mundshëm të asaj çfarë mund të ngjante në Shqipëri.

Në një raport sekret të publikuar në vitin 1947, një pjesë të së cilit Albanian Post e publikoi më 20 prill, mbi rolin që Shqipëria mund të luante në rajon, flitet me emra konkretë edhe për krerët politikë të asaj kohe në vendin e vogël ballkanas.

Si përshkruheshin ata, në raportin e CIA-s?

Enver Hoxha

I gjatë, i pashëm, atletik, me aftësi të mira komunikuese, i vendosur dhe agresiv, ambicioz, i pasinqertë dhe me mungesë të theksuar të idealeve bazë. Një komunist për pragmatizëm, më shumë se sa për ideale.

Të gjitha këto karakteristika i atribuohen një emri të vetëm në raportin e CIA-s të vitit 1947, Enver Hoxhës.

Sipas përshkrimit, si kryeministër dhe komandant i Forcave të Armatosura, ministër i Luftës dhe Punëve të Jashtme, Hoxha ishte diktatori i pakundërshtueshëm i Shqipërisë.

Enver Hoxha

“Përtej faktit se sharmi i tij personal do ta bënte një figurë ideale për diktatin komunist, ai po ashtu zotëron cilësitë e lidershipit, të cilat e bëjnë praktikisht të pazëvendësueshëm nga të tjerët”, thuhet aty.

Në të, përshkruhet se si Hoxhës i mungojnë trajnimet e liderëve rajonalë si Tito apo Dimitrov. Mirëpo, gjithashtu, fakti se ai është mbështetur tek ta dhe këshillat e tyre, për të vendosur regjimin e tij.

Teksa, urdhrat, i merrte fillimisht nga Sekretari i Përgjithshëm i Partisë Komuniste jugosllave.

Kontrolli mbi njerëzit e tij dhe shqiptarët ishte i pamohueshëm për amerikanët. Megjithatë, në rastin eventual të formimit të një Federate Ballkanike, ai nuk do të kishte shanse përballë Titos apo Dimitrovit.

Koçi Xoxe

Hakmarrës, sadist dhe i paskrupullt.

Përshkrimi i Koçi Xoxes ishte edhe më i errëti në faqet e raportit të CIA-s.

Në atë kohë Sekretar i Përgjithshëm i Partisë Komuniste, Xoxe shihej si i vetmi, i cili mund të pasonte Hoxhën në krye të shtetit.

Koçi Xoxe

Madje, për të shkruhej se ishte i vetmi pasardhës logjik i diktatorit.

“Nuk është aq piktoresk sa Enver Hoxha, por mbajtja e fuqishme e shtetit me forcë e bën të ketë kontroll mbi agjenci të caktuara”, shkruhet aty.

Më së shumti, Xoxe përshkruhet si person, të cilit i pëlqen popullariteti dhe njihej që atëherë si organizator i një sërë ngjarjesh madhore në Shqipëri.

Mehmet Shehu

Gjeneral Major Mehmet Shehu është edhe personaliteti, për të cilin raporti flet me elozhet më të larta, duke parë edhe angazhimin e tij me brigadën ndërkombëtare në Spanjë.

I guximshëm, vigoroz dhe agresiv. Flet anglisht, frëngjisht, italisht dhe spanjisht.

Mehmet Shehu

Shehu po ashtu si Xoxe, janë përmendur nga Moska si përzgjedhje për të zëvendësuar Hoxhën në rast nevoje.

Kështu thotë raporti i CIA-s.

Vetëm 36-vjeçar, ai kishte luftuar krah kauzës komuniste në Spanjë. Më së shumti, ishte rekordi që ai kishte në luftë, që e bënte shumë popullor te njerëzit.

Nako Spiro

Si një prej njerëzve më të fuqishëm të regjimit, përshkruhej Nako Spiro nga inteligjenca amerikane në vitin 1947.

Një pro-rus i fuqishëm, Spiro besonte se kapitalizmi amerikan dhe imperializmi britanik, ishin armiq vrastarë të lëvizjeve popullore.

Nako Spiro

Ndër karakteristikat e tij, ai përshkruhej si një person i organizuar, inteligjent, shumë punëtor, por i cili mund të ishte tepër i pakëndshëm.

Koço Tashko

Personazhi i fundit, i cili përshkruhet në raportin e CIA-s, është Koço Tashko, i cili nuk kishte pozita aq të larta sa të tjerët, por vlerësohej me po aq influencë.

Tashko kishte kaluar disa vite në SHBA, ku ishte diplomuar në Universitetin e Harvardit. Ai, po ashtu, kishte kaluar gjashtë vjet në Moskë dhe përshkruhej si pro-sovjetik.

Koço Tashko

Roli kryesor i Tashkos, si një person inteligjent, lidhej më së shumti me interpretimin fillestar të direktivave prej Kremlinit dhe Jugosllavisë ndaj Hoxhës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore