I akuzuari për terrorizëm dënohet me 3 vjet e tetë muaj burgim

Kujtim Daçaj, është akuzuar për organizim dhe pjesëmarrje në grup terrorist, i njëjti është dënuar me tre vjet e tetë muaj burgim për pjesëmarrje në luftërat me ISIS.

Prokuroria Speciale e Republikës së Kosovës (PSRK), e akuzonte Daçajn se ka shkuar në Siri dhe iu është bashkangjitur luftërave të organizatës terroriste, militante, ekstremiste ISIS, si dhe ka marrë pjesë në mënyrë aktive si trajner i snajpersitëve të kësaj organizate.

Ky aktgjykim është shpallur të mërkurën, nga gjykatësja e Gjykatës Themelore në Prishtinë, Valbona Musliu-Selimaj, raporton Betimi për Drejtësi.

Bazuar në këtë aktgjykim, të akuzuarit Daçaj në këtë dënim me burgim do t’i llogaritet koha e kaluar në paraburgim.

Gjithashtu, gjykatësja Musliu-Selimaj është shprehur se i akuzuari lirohet nga shpenzimet e procedurës penale për shkak të gjendjes së tij ekonomike.

Ajo po ashtu ka bërë të ditur se me shpalljen e këtij aktgjykimi, gjykata ka marrë për bazë edhe rrethanat për zbutjen e dënimit.

Ndërkaq, në seancën e shqyrtimit gjyqësor të mbajtur më 24 janar 2022, i akuzuari Daçaj kishte pranuar fajësinë për veprën penale për të cilën akuzohej.

Kurse kundër këtij vendimi, palët kanë të drejtën e ankesës në Gjykatën e Apelit brenda 15 ditësh.

Sipas aktakuzës së ngritur më shtatë dhjetor 2021, i akuzuari Kujtim Daçaj, me dashje, së bashku me bashkëshorten e tij Valdete Tafaj dhe vajzën e tij, më 5 tetor 2014, përmes pikës kufitare Hani i Elezit ka dalë nga Kosova dhe ka shkuar në Maqedoni dhe nga aeroporti i Shkupit ka udhëtuar për në Turqi e pastaj për në Siri.

Ku thuhet se iu është bashkëngjitur luftërave të organizatës terroriste, militante ekstremiste ISIS, si dhe ka marrë pjesë në mënyrë aktive si trajner i snajpersitëve të kësaj organizate terroriste, njofton betimiperdrejtesi.

Ndërsa, i njëjti në këtë organizatë terroriste ka marrë pjesë me qëllim që duke luftuar, padrejtësisht të detyrojnë qeverinë Siriane që të lë pushtetin dhe seriozisht të destabilizojnë dhe të shkatërrojnë strukturën kushtetuese, ekonomike dhe sociale dhe pastaj të krijojnë shtetin Islamik, Iraku dhe Levant, derisa ISIS-i ka pësuar disfatë të plotë.

Sipas aktakuzës, i njëjti është burgosur nga forcat demokratike Siriane, kurse më 17 korrik 2021 në mënyrë të organizuar është transferuar në Kosovë.

Me këto veprime, akuzohej se ka kryer veprën penale “Organizimi dhe pjesëmarrja në grup terrorist”, nga neni 143, para 2 i Kodit Penal, ku kryesi dënohet me burgim prej pesë deri në 10 vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.