Hovenier: Normalizimi Kosovë-Serbi do të rrisë stabilitetin dhe prosperitetin rajonal

Ambasadori i Shteteve të Bashkuara të Amerikës (SHBA) në Kosovë, Jeffrey Hovenier, takoi të hënën kryetarin e Odës Ekonomike të Kosovës (OEK), Lulzim Rafuna dhe kryetarin e Odës së Tregtisë dhe Industrisë së Serbisë (CCIS), Marko Čadež, me të cilët diskutoi mbi mënyrat për të përmirësuar bashkëpunimin ekonomik midis Kosovës dhe Serbisë.

“Diskutuam mbi mënyrat për të përmirësuar bashkëpunimin ndërmjet komuniteteve të biznesit kosovar dhe serb në Kosovë dhe Serbi. Normalizimi i marrëdhënieve mes dy vendeve do të rrisë stabilitetin dhe prosperitetin rajonal”, shkroi ambasadori amerikan në platformën “X” pas takimit.

Prioriteti i SHBA-së mbetet normalizimi i marrëdhënieve ndërmjet Kosovës dhe Serbisë. Të dyja vendet supozohet se arritën një “marrëveshje historike” më 27 shkurt 2023 në Bruksel të Belgjikës. Pastaj u arrit një dakordim për planin e sekuencimit më 18 mars në Ohër të Maqedonisë së Veriut.

Ndryshe, në vitin 2020, palët nënshkruan një marrëveshje për normalizimin e marrëdhënieve ekonomike. Ajo u nënshkrua më 4 shtator në Shtëpinë e Bardhë në Uashington, në praninë e presidentit të atëhershëm amerikan, Donald Trump, i cili e vlerësoi marrëveshjen fillim të ri për rajonin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.