Hoti shpërndan një video me deklaratat e dikurshme të Kurtit, në sfond dëgjohen këngë kushtuar diktatorit Hoxha

Deputeti i Lidhjes Demokratike të Kosovës, Avdullah Hoti, në llogarinë e tij në “Facebook”, ka shpërndarë një video-intervistë dhënë në vitin 2016 të kryeministrit Albin Kurti, i cili në kohën kur ishte në opozitë, deklaronte se aleanca mes Kosovës dhe Shteteve të Bashkuara të Amerikës nuk është edhe aq e thellë.

“Ja pse po prishen raportet me Amerikën. Nuk është e rastësishme. Është pjesë e programit të tij…”, ka shkruar Hoti në përshkrimin e video-intervistës së kryeministrit Kurti, derisa në sfond dëgjohet edhe një këngë popullore që ishte pjesë e repertorit kushtuar Enver Hoxhës, ish-diktatorit të Shqipërisë.

Ky postim i deputetit Hoti vjen në një kohë përplasjesh dhe mos pajtimesh reciproke mes kryeministrit Kurti dhe administratës së Shteteve të Bashkuara të Amerikës lidhur me situatën e krijuar në veriun e Kosovës të banuar me serbë etnikë.

Kosova është rënditur në mesin e atyre pak shteteve që mund të jenë nën sanksionet amerikane dhe ende po mbrohet nga zyrtarët amerikanë, sëpaku nga terminologjia e përdorur, ndërsa kryeministri Kurti është i pari lider që merr ultimatum nga administrata amerikane.

Një varg sanksionesh tepër serioze tashmë janë pregatitur nga Bashkimi Evropian dhe Shtetet e Bashkuara të Amerikës ndaj Kosovës për shkak të mospërfilljes së kërkesave të tyre nga kryeministri i vendit për uljen e tensioneve në veriun e territorit të banuar me shumicë serbe.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.