Kosova

Hoti, Qeverisë: Gjatë gjithë mandatit keni luftuar e neglizhuar sindikatat – kanë të drejtë të ushtrojnë padi


Ish kryeministri i Kosovës dhe deputeti i Lidhjes Demokratike të Kosovës, Avdullah Hoti.

Ish kryeministri i Kosovës dhe deputeti i Lidhjes Demokratike të Kosovës, Avdullah Hoti, ka reaguar pas mos emërimit të një anëtari nga sindikata në Bordin e Trustit Pensional, tash e një vit duke kërkuar që ky rast s’duhet të kalojë pa dhënë “përgjegjësi nga shkelësit e ligjit”.

Hoti, përmes një shkrimi në rrjetin social ‘Facebook’, ka thënë se Qeveria e udhëhequr nga kryeministri i Kosovës, Albin Kurti, vazhdimisht është duke nëpërkëmbur të drejtat sindikale.

“Një anëtar i Bordit të Trustit të Kursimeve Pensionale, i cili përfaqëson punëtorët dhe vjen nga sindikatat, nuk u emërua asnjëherë”.

“Fillimisht, Trusti u la pa bord për disa muaj, ku për pasojë miliarda euro mbetën pa menaxhim adekuat. Kur u emërua bordi para gati një viti, nuk u përfshi edhe anëtari nga sindikatat. Arsyet që u dhanë për këtë ishin se asnjëri nga aplikantët nuk i plotësonte kushtet ligjore. Nga ajo kohë nuk është rishpallur konkursi”, ka shkruar ai.

Ai tutje përgjegjësinë e ka hedhur tek tri institucione pasi sipas tij po udhëhiqen nga persona të gabuar.

“Përgjegjës për këtë neglizhencë janë Guvernatori i BQK-së, Ministri i Financave dhe Auditorja e Përgjithshmme. Këta tre zyrtarë të lartë të shtetit, që përfaqësojnë shtyllat e institucioneve që menaxhojnë e mbikëqyrin çështjet ekonomike e financiare në Kosovë, e kanë neglizhuar obligimin e tyre ligjor që punëtorët të kenë përfaqësuesin e tyre në Bordin e që menaxhon kursimet e tyre pensionale”.

Hoti ka shtuar se, “kjo neglizhencë nuk ka si të mos jetë e qëllimshme. Gjatë gjithë mandatit të kësaj qeverie, sindikatat janë luftuar e janë neglizhuar”.

Ish kryeministri i Kosovës, ua ka bërë me dije organizatave që kanë të drejtë ta padisin Kosovën.

“Gjatë mandatit të kësaj qeverie, e cila veten e quan të majtë, ka rënë organizimi sindikal. Kjo dëshmohet nga përgjysmimi i pagesave të anëtarësisë në sindikata, që ka ardhur nga presioni i qeverisë ndaj sindikatave në nivele të ndryshme të organizimit sindikal dhe në forma të ndryshme”.

“Sindikatat sot kanë të drejtë të padisin shtetin dhe këta tre zyrtarë për shkelje të ligjit. Neglizhenca për zbatim të ligjit është shkelje e ligjit, dhe shkelja e ligjit është vepër penale”.

Hoti, të mërkurën akuzoi Qeverinë e Kosovës për abuzim me paranë publike që sipas tij është arsyeja përse s’ka rezultate në ekonomi.

Ai kishte kritikuar Qeverinë edhe më 21 maj, pas vendimit që kishte marrë për ta shpërberë Ndërmarrjen e Re Energjetike të Kosovës (NKEC), ky vendim është konsideruar si tepër i vonshëm nga ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore