Hoti për marrëveshjen mes KEDS dhe Elektroserverit: Ka shumë paqartësi – Qeveria pagoi 113 milionë euro për energjinë e shpenzuar në Veri

Deputeti i Lidhjes Demokratike të Kosovës, Avdullah Hoti, ka thënë se ka shtruar pyetje parlamentare me shkrim lidhur me marrëveshjen mes kompanisë kosovare për Distribuimin e Energjisë Elektrike (KEDS) dhe Elektroserverit e cila është pronë e kompanisë energjetike të Serbisë “Elektroprivreda Srbije (EPS).

“Kjo marrëveshje nuk është bërë publike dhe ka shumë konfuzione lidhur me mënyrën e marrëveshjes. Sipas raportimit të ZRRE-së në Komisionin Parlamentar për Buxhet, Financa dhe Transfere, Qeveria e Kosovës ka pagur 113 mil euro për energjinë e shpenzuar në komunat në veri në vitin 2021 dhe 2022”, ka shkruar Hoti në Facebook.

Ish-kryeministri Hoti ka pyetur nëse qëndron ende deklarata e kryeministrit të Kosovës, Albin Kurti se “Elektroserveri nuk duhet të pranohet kurrsesi, nëse KEDS-i nuk i mbledh faturat në veri atëherë shpërndarja edhe furnizimi duhet të kthehet në pronë publike; nëse këtë nuk e bën KEDS-i duhet ta bëjë Qeveria”.

Ndërsa më 11 dhjetor, zëvendëskryeministri i Kosovës, Besnik Bislimi, ka mirëpritur nënshkrimin e kontratës komerciale për energjinë elektrike midis kompanisë kosovare për Distribuimin e Energjisë Elektrike (KEDS) dhe kompanisë serbe “Drustvo Elektrosever D.O.O” në kuadër të procesit për normalizimin e marrëdhënieve Kosovë-Serbi nën kujdesin e Bashkimit Evropian (BE).

“Tash duhet të ecet tutje edhe me hapat e tjerë të nevojshëm për t’i dhënë fund pas më shumë se 20 vitesh, ilegalitetit në mospagesë të rrymës. Kosova vazhdimisht ka luajtur një rol konstruktiv dhe ka zbatuar të gjitha detyrimet e saj, andaj dhe presim e kërkojmë të njëjtën gjë nga pala tjetër, për ta përfunduar këtë proces”, ka theksuar Bislimi.

Ai ka potencuar se operimi i Elektroserverit në pjesën veriore të territorit kosovar, ashtu sikurse parashihet në Udhërrëfyesin për Energjinë (2022) dhe Marrëveshjen për Energjinë (2013/2015), do të bëhet brenda kornizës ligjore e rregullative të Kosovës, pra brenda sistemit energjetik të Kosovës.

Elektrosever është pronë e kompanisë energjetike të Serbisë “Elektroprivreda Srbije (EPS)”, ndërsa licenën për operim në territorin e Kosovës në përputhje me kornizën ligjore dhe rregullative e ka marrë nga Zyra e Rregullatorit për Energji (ZRRE) në fund të muajit qershor të 2022, pas dakordimit për udhërrëfyesin për zbatimin e marrëveshjes për energji.

Kjo marrëveshje synon të normalizojë shpërndarjen, furnizimin, dhe faturimin e energjisë elektrike për katër komunat në veri të Kosovës të banuara me serbë etnikë – Mitrovicë e Veriut, Zveçan, Leposaviq dhe Zubin Potok.

Serbët në pjesën veriore nuk kanë paguar rrymë që nga përfundimi i luftës në Kosovë, ndërsa tani e tutje kjo çështje pritet të zgjidhet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.