Hoti: Inspektor Peci në botën e çudirave, puna e tij në bujqësi e padukshme

Deputeti i Lidhjes Demokratike të Kosovës, Avdullah Hoti, ka reaguar pasi ministri i Bujqësisë, Faton Peci e quajti “analfabet”.

“Inspektor Peci në botën e çudirave. Pasi faktet dëshmojnë se puna e tij në bujqësi është e padukshme, Inspektor Peci paska vazhduar me ofendime”, shkroi ai në Facebook.

Sipas Hotit, ministri Peci, “është në siklet se është bërë argat i atij që çdo ditë po e dëmton shtetin e Kosovës”.

“E shan çdo ditë shtëpinë e mëparshme politike të tij , por nuk guxon të thotë një fjalë për përjashtimin e Kosovës nga Defender 2023. E ka marrë mandatin nga Kuvendi për zhvillimin e bujqësisë, e ky merret me inspektimin e lokaleve për pirje të duhanit”.

Hoti ka shtuar se po shkon edhe viti i tretë i qeverisjes dhe “asnjë shenjë” nuk ka në bujqësi nga puna e Pecit.

“E ftoj zotëri Peci të nis të punoj diçka se i shkoi mandati. E vërteta është se, sipas raportit të Qeverisë, në tre mujorin e parë të këtij viti, subvencionet në bujqësi janë zero dhe investimet kapitale në bujqësi janë zero”.

“Hera e fundit që polemizoj me një analfabet”, Peci i kundërpërgjigjet Hotit

Ndërkaq ministri i Bujqësisë, Faton Peci, e kishte quajtur “analfabet’ ish-kryeministrin e Kosovës, Avdullah Hotin, pasi i ky i fundit, e ka kritikuar për shpërndarjen e subvencioneve në bujqësi duke thënë se investimet kapitale në bujqësi për periudhën janar-mars 2023 “janë zero për qind”.

“Hera e fundit që polemizoj me një analfabet. Hoti nuk ka pagesa të subvencioneve në këtë periudhë, janar – mars 2023 sepse në vitin 2022 s’ka pasur borxhe por në këtë periudhë ka pasur aplikim për subvencione”, ka shkruar Peci.

Peci ka potencuar se borxhi i vitit paraprak është zero, “ndërsa borxhet-obligimet tua kanë qenë mbi 40 milionë në vitin 2020 ndërsa kanë filluar të mbulohen në 2021-tën”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.