Historia e pabesueshme e më të mirit të Evropës – jetonte me 20 euro në javë

Futbollisti i Chelsea-t, Joginho, i cili këtë vit u zgjodh lojtari më i miri në Evropë nga UEFA, nuk ka pasur jetë të mirë në fëmijëri.

Mesfushori braziliano-italian, Jorge Luiz Frello Filho (Jorginho) është përballur me kushte shumë të vështira ekonomike.

Ai në moshën 15-vjeçare u transferua nga Brazili në Itali, pasi që konsiderohej një talent futbolli, si dhe kishte dashuri të madhe për këtë sport.

Në një intervistë të dhënë për mediat italiane, futbollisti 29-vjeçar shpjegon vështirësitë që kishte hasur kur ishte transferuar në Itali.

“Jetoja me 20 euro në javë aq sa më paguante agjenti që më solli në kamp. Por gjithmonë i shpenzoja paratë në të njëjtën mënyrë”, tregon fillimisht Jorginho.

Pasi zbuloi se ai ishte duke u shfrytëzuar financiarisht nga agjenti i tij, ndërsa luante për ekipin e të rinjve të Veronës, Jorginho pothuajse e la futbollin dhe donte të kthehej në Brazil, por nëna e tij e bindi atë që të qëndronte në Itali, për të vazhduar futbollin.

Ai e kishte të vështirë të jetonte pa të afërmit e tij. Pjesën më të madhe të parave që i merrte, i shpenzonte duke folur në telefon me familjen në Brazil. Pastaj pjesën tjetër të mbetur i shfrytëzonte për nevojat e personale të tij.

“Një telefonatë në Brazil më kushtonte pesë euro për tu dëgjuar me nënën time, disa euro më shumë për shampon dhe deodorant, dhe pjesën tjetër e shpenzoja në internet kafe, ku bisedoja me miqtë dhe familjen përmes MSN”, shtoi më tutje ai.

Ai më tutje vazhdon duke treguar që edhe ushqimet nuk mundte t’i hante ato që dëshironte.

“Ndonjëherë blija milkshake nga McDonalds që kushtonte një euro dhe patate të skuqura. Hamburgerë? Harroje, këto ushqime ishin të rezervuara vetëm për fëmijët e pasur”.

“Pastaj ulesha në cep të sheshit me qumështin tim dhe vetëm shikoja njerëzit. Kështu kaloja pjesën më të madhe të kohës time”, tha mes tjerash Jorginho duke shtuar “Vështirësitë të bëjnë më të fortë”.

Derisa, pjesa tjetër e jetës së Jorginho-s është një histori tjetër.

Në qershor të vitit 2010, ai u huazua te skuadra italiane që garonte në Serie C2, Sambonifacese, ku zhvilloi 31 takime në sezonin e tij të parë.

Pas paraqitjeve të mira aty, Verona e riktheu futbollistin e tij, ku debutimin e bëri më 4 shtator të 2011-tës, në një ndeshje në Serie B kundër Sassuolo-s.

Me paraqitjet e mira me Veronën gjatë dy sezoneve në Serie B dhe një në Serie A, shumë klube të mëdha u interesuan për futbollistin që dikur nuk mund të blinte ushqimin që dëshironte.

Në sezonin e tij të parë në Serie A, mesfushori zhvilloi 19 takime me Veronën, prej të cilave realizoi shtatë gola.

Pastaj pjesa më e rëndësishme në karrierën e tij, ndodhi në janar të vitit 2014, kur skuadra e Napolit e transferoi atë për një shifër prej 9.5 milionë eurove.

Me Napolin ai luajti për katër vite e gjysmë, ku zhvilloi 160 takime në të gjitha garat. Gjatë kësaj periudhe ai me klubin e tij fitoi Kupën dhe Superkupën e Italisë në sezonin 2013/14.

Dhe, në verën e vitit 2018, futbolli italian mori fund për Jorginho-n, pasi që ai do të provonte një aventurë të re në Premier Ligën angleze.

Klubi i Chelsea-t pagoi plot 57 milionë euro për ta transferuar futbollistin në Londër. Në fakt ish-trajneri i tij, Maurizio Sarri, e donte me çdo kusht futbollistin atje, pasi që i njëjti u transferua nga Napoli te Chelsea.

Dhe, pjesa me Chelsea-n do të mbetet një histori për futbollistin braziliano-italian. Ai me fanellën blu, arriti të fitojë Ligën e Kampionëve, Ligën e Evropës dhe Superkupën e Evropës.

Jorginho gjithashtu fitoi Kampionatin Evropian me Italinë, ku ishte njëri ndër futbollistët kyç në fitimin e këtij trofeu madhor.

Këto suksese me klubin dhe kombëtaren e tij, bërën që UEFA ta zgjedhë futbollistin më të mirë në Evropë për vitin 2021.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.