Historia e cila qëndron pas këngës “Thikat e mia” të Alban Ramosajt

Ka qenë një nga emrat më të përfolur në mediat rozë këtyre ditëve, kjo pas triumfit të tij në edicionin e këtij viti të festivalit “Kënga Magjike”.

Bëhet fjalë për këngëtarin, Alban Ramosaj, i cili u mirëprit nga juria e festivalit dhe publiku teksa u prezantua me këngën e tij “Thikat e mia”.

Madje jo të paktë ishin fansat të cilët janë shprehur se kanë krijuar “varësi” nga tingujt e këngës “Thikat e mia”, por a e dini historinë që qëndron pas saj?

Albani ka zbuluar detaje rreth tekstit të këngës duke pohuar se është i bazuar në ngjarje të vërtetë, shkëputur nga personalja e artistit.

Sipas tij, këngën fituese të “Këngës Magjike”, ai e kishte shkruar gjatë kohës që ka qëndruar në Spanjë, por e përfundoi si produksion në Shqipëri.

Kënga është kompozim i tij, ndërsa produksioni është realizuar nga Bruno, nën logon e “ThreeDots”.

“Kënga lindi nga një histori e imja në Spanjë, pra mund të them me plot gojën që është dedikim. Si çdo histori spanjolle, fundi është dramatik. Të gjithë kemi pasur lidhje të çuditshme, të gjithëve na ka mbyt xhelozia, por jo me shije latine”, është shprehur Albani.

Ramosaj, po ashtu ka shpjeguar edhe domethënien e “thikave” të tija.

“Thikat janë një metaforë për të treguar posesivitetin, dramat, xhelozinë, por edhe kënaqësinë e dashurisë, edhe pse toksike. Në këtë rast, posesivi jam unë, e kur do pa hile, pa dashur kthehesh në dominant”, ka shtuar ai.

Në anën tjetër, në pjesën e tekstit ndërhyrje ka pasur edhe nga këngëtarja, Fifi.

Mes tjerash, Albani ka treguar se kjo këngë është shumë personale sepse i dedikohet një historie dashurie tashmë të përfunduar me një vajzë spanjolle.

Ndryshe, kënga fituese është po ashtu ndër më të klikuarat e festivalit dhe deri më tani ka arritur shifrën prej afro 4 milionë klikime në YouTube.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.