Hiqen maskat në ambientet e mbyllura, rikthehen klubet e natës në Shqipëri

Komiteti Teknik i Ekspertëve, në mbledhjen e 26 prillit, ka vendosur heqjen e detyrimit të mbajtjes së maskave në ambientet e mbyllura.

Ky vendim ka ardhur pas rënies së rasteve të reja dhe fataliteteve nga COVID-19 në Shqipëri.

Përveç heqjes së kësaj mase, Komiteti ka vlerësuar se në vendin tonë do të lejohet muzika pas orës 23:00 dhe rihapja e klubeve të natës.

Gjithashtu zëvendësministrja e Shëndetësisë dhe Mbrojtjes Sociale, Mira Rakacolli, ka njoftuar  vaksinimin me dozë të katërt për personat mbi 60 vjeç.

Po ashtu udhëtarëve, të cilët do të futen në territorin shqiptar, nuk do t’u kërkohet certifikata e vaksinimit. Kjo masë do të hyjë në fuqi më 1 maj.

Ndërsa, sa u përket vaksinave, deri më tani në Shqipëri kanë mbërritur mbi 3 milionë doza.

50% e moshës 16 vjeç e lart kanë marrë të paktën dy dozat e vaksinës.

Vaksina më e përdorur, sipas Komitetit, është ajo e Pfizer, ndjekur nga Coronavac dhe AstraZeneca.

“Virusi është akoma prezent, ndaj është e rëndësishme që qytetarët të jenë vigjilentë dhe të ndjekin këshillat për vaksinimin ndaj COVID-19”, ishte mesazhi i Komitetit.

Me vendimet e kësaj dite janë hequr të gjitha masat që filluan të vendoseshin dy vite më parë – kohë kur në Shqipëri u shfaq rasti i parë me COVID-19.

Vendi ynë që, prej muajit mars, ka parë një numër të ulët të rasteve me COVID-19.

Që prej shfaqjes së saj më 9 mars të vitit 2020, në Shqipëri kanë humbur jetën 3 mijë e 496 qytetarë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.