Sport

Hetim ndërkombëtar për Dukën – Bashkia e Tiranës merr hapin


Bashkia e Tiranës, në cilësinë e aksionerit kryesor të klubit të futbollit Tirana, do të kërkojnë një hetim kombëtar dhe ndërkombëtar për shkelje dhe korrupsion ndaj kreut të Federatës Shqiptare të Futbollit, Armand Duka.

Burime pranë Bashkisë, kanë konfirmuar tashmë se prej dy javësh, ka përgatitje mbi një lëvizje të tillë. Një grup juristësh shqiptarë, amerikanë dhe britanikë, kanë asistuar aksionerët e Tiranës, për të përmbledhur një dosje voluminoze të shkeljeve që sipas tyre, Duka ka kryer në 20 vjet.

Një sërë instancash shqiptare e të huaja, do të prezantohen me çështjen. Ndër to, Prokuroria e Posaçme SPAK, ajo e Tiranës, Krimi Ekonomik, Agjencia e Pastrimit të Parave, Hetimi Tatimor, FBI, DEA apo edhe dy ambasadat e SHBA-ve dhe Britanisë së Madhe në Shqipëri.

Armand Duka

Në dosje do të jenë të përfshira çështje si shitjet e ndeshjeve ndërkombëtare apo bastet e paracaktuara. Kryesisht me këtë çështje, pritet të merret FBI-ja.

Ndërsa, mbi pretendime për përfshirjen e parave të drogës me aprovimin e Dukës në futbollin shqiptar, pritet të merret DEA amerikane.

Dosja britanike, mund të merret kryesisht me shpenzime të pajustifikuara të familjes Duka. Kryesisht, në blerje pronash, makinash luksoze e asetesh. I përfshirë do të jetë edhe komisariati i Scotland Yard.

Vepra të tjera të pretenduara për pastrim të parave me anë të kompanive të ndryshme, do t’i kalojnë në shqyrtim Prokurorisë së Tiranës dhe SPAK.

Burime të Bashkisë Tiranë, kanë pohuar po ashtu përfshirje të konsulentëve të huaj të mediave, për të ndërkombëtarizuar shkeljet e Dukës.

Një kërkesë do të ketë ndaj dy ambasadave, edhe për revokim të vizave ndaj familjes Duka, mbi bazën e minimit të futbollit shqiptar.

Një retorikë e tillë është nisur disa ditë më parë nga kryeministri Edi Rama, i cili bëri të qartë se gjërat në strukturat drejtuese të futbollit shqiptar duhet të ndryshojnë, pasi ato nuk po promovojnë më vlera.

Më pas, vetë kreu i Bashkisë Tiranë, Erion Veliaj, ishte ai i cili nisi një gjuhë armiqësore ndaj Dukës, me akuza ndaj tij mbi atë çfarë ka ndodhur në sferën futbollistike shqiptare në 20 vjet.

Gjithashtu, kjo lëvizje e Bashkisë vjen vetëm pak ditë përpara mbajtjes së zgjedhjeve të radhës për kreun e FSHF-së, ku Duka garon për të gjashtin mandat.

Përballë tij ai sheh komentatorin e njohur, Dritan Shakohoxha.

/Albanianpost.com


Lajmet kryesore