Hasani: Marrëveshja e Ohrit lëviz shtyllat e shtetësisë

Shtyllat e shtetësisë së Kosovës janë në rrezik. Kështu ka deklaruar ish-kryetari i Gjykatës Kushtetuse, Enver Hasani, duke shtuar se kjo po bëhet falë marrëveshjes së arritur në Ohër nga kryeministri i Kosovës, Albin Kurti dhe presidenti i Serbisë, Aleksandar Vuçiç.

Hasani në T7 tha se kjo marrëveshje tregon që Kosova përfundimisht është futur në një proces që do ta bëjë të prekshme kushtetutën materiale që ka nis të krijohet në mënyrë graduale gjatë procesit të dialogut.

“Është marrëveshje bazë që rregullon materien tërësisht kushtetuese dhe definon origjinën, organizmin dhe funksionimin e autoritetit publik sa i përket komunitetit lokal serb, dhe raportin e këtij autoriteti publik me këta qytetarë serbë, që janë shtetas të Kosovës”.

“Bëhet fjalë për materie, apo marrëdhënie shoqërore të autoritetit publik të cilat në pjesën dërrmuese mbi 90 për qind i takojnë kushtetutës. Kjo rrethanë, e bën që Kosova përfundimisht është fut në një proces që do ta bëj të prekshme kushtetutën materiale që ka nis të krijohet në mënyrë graduale gjatë procesit të dialogut edhe më herët, por tash e bën të prekshme, pasi i ka lëvizë shtyllat bazike të shtetësisë së Kosovës”, ka deklaruar Hasani.

Ish-kryetari i Gjykatës Kushtetuese të Kosovës, Enver Hasani, ka thënë se serbët do të fitojnë autonomi territoriale, me këtë marrëveshje të dakorduar nga Kosova dhe Serbia më 18 mars.

Pa lënë në harresë faktin se kjo obligon të gjitha marrëveshjet e arritura paraprakisht të zbatohen, duke përfshirë edhe ato të vitit 2013, e që flet për krijimin e Asociacionit të Komunave me Shumicë Serbe.

“Nëse marrëveshja thotë siç thotë, të gjitha palët dhe nuk ka rëndësi cilat nene pasi të gjitha duhet të zbatohen. Aty thotë se edhe të gjitha marrëveshjet duhet të implementohen. Kjo i bie se duhet ai i vitit 2013 të zbatohet, pasi nuk e njeh vendimin e Kushtetutës”, tha ai.

Hasani shtoi se Serbia ka fituar nga kjo marrëveshje më shumë se sa Kosova.

Marrëveshja Kosovë-Serbi ka hyrë në fuqi me deklaratën e Josep Borell të shtunën e 18 marsit rreth mesnatës. Sipas BE’së ajo është ligjërisht obligative. Kështu e shohin edhe Emisari i SHBA’së Gabriel Escobar dhe ambasadori Christopher Hill.

Marrëveshja me 11 nene, e bërë publike më 27 shkurt, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.

Ajo kërkon, po ashtu, nga palët që t’i zbatojnë të gjitha marrëveshjet e arritura deri më tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria në Prishtinë e ka refuzuar deri më tash, me arsyetimin se mund të rrezikojë funksionalitetin e shtetit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.