Hasani: Draft-Statuti është “fund e krye” anti-kushtetues, krijon autonomi politiko-territoriale

Ish-kryetari i Gjykatës Kushtetuese të Kosovës, Enver Hasani, ka thënë se përmbajtja e draft-statutit të hartuar nga bashkësia e organizuar ndërkombëtare për Asociacionin e Komunave me Shumicë Serbe, në formën e tij aktuale është “fund e krye” kundërkushtetues, derisa ka shtuar se në këtë drejtim, bëhet fjalë për një “kushtetutë të re” vetëm për serbët e Kosovës.

Në një intervistë për “Radio Evropa e Lirë” të hënën, profesori i të Drejtës dhe Marrëdhënieve Ndërkombëtare në Universitetin e Prishtinës, ka theksuar se draft-statuti “modern dhe evropian” për Asociacionin e Komunave me shumicë serbe, krijon autonomi politiko-territoriale, sepse, sipas tij, parashihen kompetenca të theksuara shtetërore.

Në pyetjen se çfarë është kundërkushteutese në draft-statutin e pranuar në parim nga Qeveria e Kosovës, ai ka veçuar çështjen e institucioneve shëndetësore dhe arsimore, por edhe përfshirjen e Rezolutës 12/44 të Këshillin të Sigurimit të Organizatës së Kombeve të Bashkuara (OKB), ndërsa ka shtuar se rreziku kryesor është se draft-statuti krijon pushtet paralel.

“Rreziku kryesor është se ky dokument nuk krijon nivel as të tretë, as të katërt të pushtetit, është pushtet paralel, si në aspektin horizontal, ashtu në atë vertikal. Në aspektin horizontal, ky pushtet që i krijon organet, kuvendin, organin ekzekutiv dhe çështje të sigurisë, caktimin e policëve ku janë komunat serbe, bën ndarjen e punës – dokumenti, jo Kushtetuta e Kosovës”.

Ai ka nënvizuar se nuk do të thotë që draft-statuti bëhet kushtetues vetëm pse mund të dërgohet në Gjykatën Kushtetuese, derisa përmend se draftet për Asociacionin e Komunave me Shumicë Serbe do të duhej të ishin në përputhje me aktgjykimin e vitit 2015 të Gjykatës Kushtetuese, mirëpo drafti aktual nuk e ka marrë fare për bazë, duke e përjashtuar nga preambula.

“Por, tjetër është që të procedohet në Gjykatën Kushtetuese, tjetër është të vendoset për përmbajtjen e tij. Gjykata Kushtetuese, në qoftë se dëshiron të vlerësojë nëse është në frymë të kushtetutës apo jo, duhet së pari ta ndërrojë aktgjykimin e vitit 2015. Me atë aktgjykim, nuk ka jurist të Kosovës dhe as përtej, që mund ta pajtojë atë aktgjykim me këtë statut”, ka shtuar Hasani.

Hasani ka potencuar ndër të tjera se ajo që është “drita mega e kuqe” në draft-statutin e Asociacionit të Komunave me Shumicë Serbe janë tri dimensione, të cilat, sipas tij, duhet të përjashtohen urgjentisht nga korniza aktule; Rezoluta 12/44, çështja e arbitrazhit dhe përfshirja e një kapitulli itë veçantë për të specifikuar kontrollin administrativ të ligjshmërisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.