Haradinaj thirrje Qeverisë: Tërhiquni nga sjelljet anti-kushtetuese, ruani sigurinë juridike

Ish kryeministri i Kosovës dhe kryetari i Aleancës për Ardhmërinë e Kosovës (AAK), Ramush Haradinaj, ka bërë thirrje që Qeveria e Kosovës të heqë dorë nga sjelljet e saj anti-kushtetuese.

Haradinaj, përmes një shkrimi në rrjetin social ‘Facebook’, teksa ka kujtuar Betejën e Kosovës dhe ditën e miratimit të Kushtetutës ka thënë se pushteti aktual gjatë gjithë kohës ka bërë shkelje në këtë drejtim.

“Sot, në 16-vjetorin e shënimit të Ditës së Kushtetutës kemi një qeveri që vazhdimisht ka shkelur Kushtetutën, qoftë përmes nxjerrjes së vendimeve anti-kushtetuese apo mospërfilljes së saj. Andaj i bëj thirrje qeverisë që të tërhiqet nga sjelljet anti-kushtetuese dhe ta ruajnë sigurinë juridike të shtetit”, ka shkruar ai.

Ai tutje ka lavdëruar Kushtetutën duke thënë se është moderne e avancuar e po ashtu që shkruar mbi parimet më të larta.

“Është garantuese e parimeve të lirisë, demokracisë dhe drejtësisë – gardiane e fortë ndaj çdokujt që rrezikon sistemin tonë me qasje autoritare”.

Edhe kryetari i Partisë Demokratike të Kosovës (PDK), Memli Krasniqi, ka uruar 16 vjetorin e Kushtetutës së Kosovës, duke thënë se në tri vitet e fundit si opozitë kanë qenë të obliguar ta mbrojnë atë nga pushteti.

“Fatkeqësisht, në tri vitet e fundit kemi pasur nevojë që Kushtetutën tonë ta mbrojmë më së shumti nga vet Qeveria e Kosovës – që e ka obligim ligjor, institucional dhe kombëtar t’i dalë zot asaj”.

Në më shumë se dy vjet e gjysmë qeverisje në mandatin katër vjeçar, qeveria e drejtuar nga Albin Kurti, e ka shkelur gjashtë (6) herë Kushtetutën e Kosovës.

Gjatë kohës sa ishte në opozitë, kryeministri Albin Kurti, ishte mjaft i zëshëm në sulmet dhe denigrimin e atyre personave që Gjykata Kushtetuese vendoste kundër vendimeve të tyre.

Madje, Kurti si opozitar deklaronte: ”Kush e shkelë ligjin është kriminel, kush e shkelë Kushtetutën është superkriminel”.

Por, vetë në pushtet, shkeljen e Kushtetutës e ka bërë normë qeverisëse, derisa, deri më tani, përkundër shkeljeve të shumta kushtetuese, nuk ka asnjë dorëheqje, pra askush nuk ka marrë përgjegjësi.

Më 9 prill të vitit 2008 Kushtetuta e Kosovës është ratifikuar në Kuvendin e Kosovës.

Ndërsa më 15 qershor të atij viti ka Kushtetua ka hyrë në fuqi.

Pjesa më e madhe e kësaj Kushtetute rrjedh nga Plani i ish-presidentit Martti Ahtisaarit.

Kushtetuta si akti më i lartë juridik që garanton të drejtat dhe liritë themelore të të gjithë qytetarëve të vendit ka dhënë të drejta specifike grupeve minoritare dhe një ambient më të sigurt për të gjithë qytetarët e Kosovës.

Kushtetuta e Kosovës përbëhet nga 14 kapitur dhe 162 nene.

9 prilli shënohet si festë shtetërore në Kosovë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.