Haradinaj-Stublla: Asociacionin që e kërkon SHBA-ja, nuk është ai që e pretendon Serbia

Sipas ish-ministres së Punëve të Jashtme, Meliza Haradinaj-Stublla, Asociacioni që e kërkojnë Shtetet e Bashkuara të Amerikës nga Kosova, nuk është asociacioni që e pretendon Serbia.

Ajo përmes një shkrimi në rrjetin social ‘Facebook’, ka kërkuar nga ekzekutivi që të jenë “të shkathët” në këtë drejtim.

“Qeveria e Kosovës dhe klasa politike në përgjithësi, do të duhej të jetë e shkathët në shpërfaqjen reale të pretendimeve të Serbisë, sepse asociacionin që e kërkon SHBA prej Kosovës nuk është asociacioni që në realitet e pretendon Serbia”.

Kërkesë tjetër e ish ministres Stublla ishte që dialogu të trajtohet me prioritet ashtu siç kërkon edhe SHBA-ja.

“Siç dihet tashmë, Shtetet e Bashkuara e konsiderojnë dialogun Kosovë – Serbi si çështje urgjente të sigurisë evropiane, dhe status kuoja do të rrezikojë edhe më shumë brishtësinë e kësaj sigurie – sidomos pas fillimit të luftës në Ukrainë, zhvillimeve kriminale në veriun e Republikës së Kosovës, dhe kërcënimit të hapur të Serbisë për luftë kundër Kosovës”.

“Prandaj, edhe ne në Kosovë, do të duhej t’a trajtojmë si të tillë e të kapitalizojmë vëmendjen amerikane për të arritur sa më parë të një zgjidhje përfundimtare me Serbinë, duke maksimizuar interesat tona afatgjate në forcimin dhe avancimin e subjektivitetit tonë ndërkombëtar, por assesi ky forcim i subjektivitetit ndërkombëtar nuk do të duhej të bëhet me çmimin e defunksionalizimit të shtetit përbrenda”, ka shkruar ajo.

Zgjidhje e duhur sipas ish ministres së Punëve të Jashtme, do të ishte që institucionet e Kosovës bashkë me partitë që e kanë nënshkruar Asociacionin në të kaluarën të diskutojnë për qëndrim të përbashkët të Kosovës.

“Institucionet e Kosovës bashkë me opozitën (specifikisht partitë që e kanë nënshkruar Asociacionin në të kaluarën) do të duhej të ulen bashkë e të diskutojnë qëndrimin e përbashkët të Kosovës kundër kërkesës serbomadhe për implementim të një asociacioni monoetnik, me kompetenca ekzekutive – të tipit të Republikës serbe në Bosnje”.

Ndërsa ka shtuar tutje se Kosova nuk duhet të mbetet peng i gabimeve të kaluara.

“Fundja, edhe në marrëveshje të Brukselit Serbia është pajtuar që Gjykata Kushtetuese e Kosovës do të ketë fjalën e fundit rreth një asociacioni potencial, andaj Kosova assesi të mos lejojë të mbetet peng i gabimeve të së kaluarës”.

Këshilltari i Departamentit amerikan të Shtetit, Derek Chollet, në një periudhë përpjekjesh për ripërtëritjen e dialogut mes Kosovës dhe Serbisë, erdhi nga Uashingtoni në Prishtinë të mërkurën për t’u takuar me krerët institucionalë dhe me liderët e partive politike në vend.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.