Lajme

Haradinaj në Kuvend: Faji nuk është vetëm i pozitës, peshën e pasojave do ta bartim të gjithë


Ish kryeministri i Kosovës, Ramush Haradinaj

Për ish kryeministrin e Kosovës, Ramush Haradinaj, situata aktuale në Veri do të ketë pasoja për të gjithë vendin.

Sipas tij, në një situatë të tillë nuk duhet të fajsohet vetëm Qeveria.

“Çdo sekondë, çdo minutë, çdo ditë po na kushton. Besoni nuk do të jetë vetëm faji i pozitës, të gjithë do të bartim peshën e pasojave që na vijnë si vend”, ka thënë Haradinaj.

Ai tutje ka paraqitur tri veprime të cilat konsideron që duhet të ndërmerren nga pushteti ekzekutiv.

“Veprimi i parë është pranimi i kërkesës për shtyrje të vendimit të targave. Të gjithë ju që e ndjeni peshën e situatës, ju lutem të bashkoheni në veprimin e parë e veprimin e parë është pranimi i kërkesës për shtyrje të vendimit të targave deri në marrëveshje”.

“Veprimi i dytë është dialogu me serbët lokalë, pra me serbët e Kosovës. Jo vetëm, nga kjo foltore por një dialog intensiv për t’i kthyer ata në institucionet”.

Haradinaj, kërkoi edhe dialog me opozitën, por edhe samit në Shtetet e Bashkuara të Amerikës për zgjidhje të situatës me Kosovës dhe Serbisë.

“Veprimi i tretë është një dialog intensiv i Qeverisë me Opozitën, për shkak të gjendjes, njëkohësisht veprimi i katërt që duhet ta kërkojmë ne së bashku është një samit disa ditorë në Amerikë, deri në përmbylljen e marrëveshjes finale Kosovë-Serbi mes përfaqësuesve në këtë rast, kryeministrit të Kosovës dhe përfaqësuesit të Serbisë”.

Kuvendi i Kosovës.

Situata në Veri

Pas largimit të Policisë në Veri të Mitrovicës, deputetëve të Listës Serbe nga institucionet e Kosovës, gjykatësve dhe prokurorëve serbë, të mërkurën dorëheqjet e tyre kanë dorëzuar edhe zyrtarët e lartë të Komisioneve Komunale Zgjedhore.

Me njoftimin se do të organizohen zgjedhje të jashtëzakonshme për zëvendësimin e kryetarëve të komunave dhe deputetëve serbë të cilët dhanë dorëheqje, kryetarët e komisioneve zgjedhore komunale në mënyrë të organizuar me qëllim të bojkotimit të këtij procesi kanë dhënë dorëheqje në mëngjesin e sotëm nga pozitat e tyre.

Në anën tjetër të martën, Komisioni Qendror i Zgjedhjeve (KQZ), ka pranuar kërkesën nga presidentja e Kosovës, Vjosa Osmani për emrat e personave në radhë për të zëvendësuar vendet e lira nga dorëheqja e deputetëve të Listës Serbe.

Të njëjtit janë duke kundërshtuar planin e Qeverisë së Kosovës për riregjistrimin e makinave me targa RKS, apo Republika e Kosovës.

Beogradi, që ushtron kontroll mbi ta, insiston në targa neutrale ndaj statusit të Kosovës, por institucionet e Kosovës  nuk heqin dorë nga vendimi i saj.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore