Haradinaj në 35 vjetorin e grevës së minatorëve: Mungesa e investimeve e dërgon “Trepçën” drejt kolapsit

Ish kryeministri i Kosovës dhe kryetari i Aleancës për Ardhmërinë e Kosovës (AAK), Ramush Haradinaj, në shënimin e 35-vjetorit të grevës së minatorëve është shprehur se kjo grevë është shndërruar në një “rezistencë gjithëpopullore”.

Haradinaj, përmes një shkrimi në rrjetin social ‘Facebook’, teksa ka lavdëruar punën e tij në kohën kur ishte kryeministër, ka kritikuar qeverisjen aktuale të kryeministrit të Kosovës, Albin Kurti.

“Fatkeqësisht, kur jemi 5 vjet nga votimi i Statutit të Trepçës, menaxhimi i dobët  dhe mungesa e investimeve serioze, këtë ndërmarrje po e dërgon drejt kolapsit. Nëse nuk intervenohet shpejt, gjendja do bëhet edhe më serioze”.

“Është turpëruese retorika mashtruese e pushtetarëve e cila nuk e mbulon mungesën e financave, situatën me borxhe e prodhim material. Ndërkaq, punëtorët përballen me kushte të rënda pune, të ardhura tejet minimale”, ka shkruar ai.

Duke shtuar se Trepça ka potencial ta rikthejë shkëlqimin e dikurshëm dhe të jetë krah i fortë i ekonomisë së Kosovës.

Ndërsa, ka treguar veprimet që kishin bërë gjatë kohës kur ai ishte kryeministër.

“Gjatë mandatit tim si kryeministër i vendit, në mars të vitit 2019, me votimin e Statutit të “Trepçës” e regjistruam si kompani në bazë të ligjeve të Kosovës”.

“Ky ishte një hap kyç për t’i dhënë këtij aseti fuqinë e nevojshme për investime dhe gjenerim stabil të të hyrave, për punësim dhe për ta rikthyer atë në funksion të plotë të ekonomisë së vendit dhe shtetit të Kosovës, si dhe për të mbështetur vetë Minatorët, duke i bërë hisedarë me 20% të aksioneve”.

Sipas tij, rasti i grevës së minatorëve në atë kohë kishte lëkundur themelet e shtetit të atehershëm.

“Grevat e Minatorëve ishin akte të guximshme dhe momente kthese në rrugën tonë drejt lirisë. Sot, në shënim të 35-vjetorit të Grevës së Minatorëve, me nderim kujtuam veprën e më shumë se 1300 minatorëve të asaj kohe”.

“Kjo grevë u shndërrua në një rezistencë gjithëpopullore, duke lëkundur themelet e shtetit të atëhershëm të Jugosllavisë”, ka shkruar ai.

Sipas tij, rikthimi i kësaj miniere ishte forma më e mirë për të shpërblyer sakrificën e atëhershëm të punëtoreve.

Albanian Post gjatë ditës ka publikuar një video ku minatorët rrëfejnë për grevën që kishte ndodhur para 35 vjetëve.

Në kohën kur regjimi i ish-Jugosllavisë në krye me Sllobodan Millosheviçin donte të heqtë autonominë e Kosovës, duke mbyllur shkollat e spitalet, duke burgosur e torturuar shqiptarë të pafajshëm ajo çka i bëri kësaj balle ishte kryengritja e minatorëve të “Trepçës”, që aso kohe ishte më e fuqishmja.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.