Hapet për qarkullim ura e re Tapizës

Ministrja e Infrastrukturës dhe Energjisë, Belinda Balluku, mesditën e 16 shkurtit ka bërë me dije se kanë përfunduar punimet dhe hapet për qarkullimin e automjeteve ura e re e rindërtuar e Tapizës.

Balluku bëri me dije se është një ndër të shumtët projekte që po e dorëzojnë përpara afatit.

“Tani do të nisim me planin e madh për të vazhduar me rikonstruksionin e urave ekzistuese të cilësuara me më shumë rrezik”, vijoi Balluku në fjalën e saj.

Së bashku me Ballukun i pranishëm ishte dhe drejtori i Përgjithshëm i Autoritetit Rrugor Shqiptar, Ervis Berberi.

Të dy drejtuesit theksuan se janë nëntë ura me më shumë rrezik dhe tashmë do të nisë puna për urën e Viroit.

“Ura e Viroit parashikohet të nisim punimet brenda muajit shtator. Me vazhdimin e procedurave brenda qershorit bëjmë paketën e plotë dhe hapim procedurat. Nëse procedurat mbarojnë më shpejt punimet mund të nisin edhe në fillim të muajit gusht”, tha Berberi në fjalën e tij.

Ndërsa u ndal dhe përfundimi i urës së Tapizës, ku shtoi se është një aks i cili ka një fluks trafiku shumë të madh nga veriu në drejtim të Tiranës. Sipas tij kjo ka qenë dhe arsyeja se është punuar me ritme të shpejta për tu hapur për qarkullim para afatit.

‘“Kjo është një urë 120 metra me gjerësi 12.5 metra. 10.5 metra është asfalt pjesa tjetër është trotuari”, e përmbylli ai.

Një vit më parë, më 12 shkurt, nisën punimet për rindërtimin e kësaj ure që lidh Fushë-Krujën dhe Tiranën dhe anasjelltas.

Ura e Tapizës është ndërtuar në vitin 1973. Kjo urë, sipas njoftimeve kishte shumë vite e amortizuar. Balluku, pati njoftuar një vit më parë deklaroi se tërmeti i 26 nëntorit 2019, e bëri edhe më emergjente ndërhyrjen në këtë objekt.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.