Hakerët, të cilët fshihen prapa grupimit “Homeland Justice”, kanë publikuar në kanalin e tyre “Telegram” identitetin e 600 punonjësve të Shërbimit Informativ Shqiptar (SHISH).
Pa zbuluar asnjë mesazh të kriptuar, kësaj radhe grupimi ka zbuluar të dhënat e punonjësve të inteligjencës shqiptare duke përfshirë: emrat, email-et dhe numrat e telefonit.
Drejtori i Shërbimit Informativ të Shtetit, Helidon Bendo, ra “pre” e publikimeve nga grupimi i hakerëve më 19 tetor.
Përmes faqes së tyre, haker-ët publikuan një skedar të Bendos, me gjeneralitetet e tij dhe me të dhënat nga sistemi TIMS, ku shfaqen hyrje-daljet jashtë dhe brenda vendit, në një periudhë kohore prej 17 vitesh – nga viti 2005 deri në vitin 2022.
“Për sa kohë nuk i vendosni në frerë aktivistët terroristë të grupimit MEK, publikimet tona do të vijojnë”, shkruanin hakerët në publikimin e tyre.
Më parë, “Homeland Justice” ka publikuar edhe dokumente, të cilat lidheshin me kryeministrin shqiptar Edi Rama dhe me ish-drejtorin e Përgjithshëm të Policisë së Shtetit, Gledis Nano.
Por, në rastin e këtij të fundit, kanë qenë të publikuara edhe email-e të kryepolicit, mbi disa çështje me rëndësi në vend.
Për shkak të ndjeshmërisë së të dhënave personale, redaksia e Albanian Post ka vendosur të mos publikojë asnjë faqe të dosjes, ku shfaqen postet apo gjeneralitetet e punonjësve të SHISH-it.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
