Hajdari i thotë Hotit ‘hipokrit’, Konjufca kritikohet për fjalorin e toleruar

“Ju lutëm mos u bëni më shumë hipokrit”, i tha ministrja e Industrisë, Ndërmarrësisë dhe Tregtisë Rozeta Hajdari, deputetit nga radhët e Lidhjes Demokratike të Kosovës, Avdullah Hoti pas kritikave të tij për ligjin e ri që planifikohet të plotësoj dhe të rregulloj më mirë menaxhimin e parqeve industrial.

“Faleminderit shumë për sjelljen tuaja, por vërtetë hipokrizia nuk është e mirë për këtë parlament”, shtoi tutje Hajdari.

Teksa, pati një sqarim edhe për deputetin e LDK-së Avdullah Hoti, edhe për atë të Partisë Demokratike të Kosovës, Ferat Shala se çka do të lehtësoj ky ligj.

“Ligji i ri do të plotësoj dhe do të rregulloj shumë mirë menaxhimin e parqeve industriale, do të ndihmoj për krijimin e një ekosistemi të strukturuar që në një mënyrë gjithëpërfshirëse do të adresoj të gjitha nevojat e bizneseve, do të ofroj edhe shërbime edhe për bizneset e jo vetëm infrastrukturë”.

“Për më shumë tek komentet e zotërit Hoti, vërtetë është hipokrizi nga ana juaj që mundoheni me devlerësu këtë ligj, i cili ligj do të sjell shumë më mirë menaxhimin e zonave ekonomik sepse deri tani nuk ka pasur menaxhim të mirëfilltë të zonave ekonomike”, tha Hoti.

Sipas Hajdarit, dikasteri të cilin ajo e udhëheq deri tani ka pasur “shumë suksese”.

“Ju lutem mos u bëni më shumë hipokriti përmes vlerës së shtuar në këtë ligj, e për deputetin Ferat Shala që flet për përformancën e ministrisë sonë, unë po ju njoftoj se ministria e Industrisë ka korrur shumë suksese falë qeverisjes së mirë Kurti 2”.

Pas deklaratës së Hajdarit, Hoti paraqiti edhe një kërkesë ndaj kryetari të Kuvendit dhe fjalorit që po përdoret në këtë institucion legjislativ.

“Unë besoj që është detyrë e juaj që edhe deputetë edhe ministra që kur përdorin fjalor joparlamentar të u tërhiqet vërejtja. S’ki me kënd të debatosh këtu. Ti i shtron disa argumente, ministrja që e mbulon një sektor të caktuar nuk është në gjendje as që t’i kuptoj ato përkundrazi del në Kuvend dhe fyen deputetët shikoni në çfarë gjendje e keni sjellur debatin në Kuvendin e Kosovës dhe kryetari as nuk u tërheq vërejtjen”.

Ai ka shtuar se këto sjellje e deklarata asnjëherë më parë nuk kanë qenë të tilla në Kuvendin e Republikës së Kosovës.

“Kjo sjellje nuk është parë, këtu ka pasur ballafaqime shumë të ashpra por ka pasur një nivel të integritetit dhe ruajtës. Nuk e di se ku dëshironi të shkoni me këtë sjellje dhe me këtë model që e keni rrënjosur, por shpresoj që të merr fund së shpejti”.

Pas kritikave të Hotit, kryetari i Kuvendit, Glauk Konjufca, ka thënë se një fjalor i tillë është përdorur nga opozita ‘qindra herë’ me fjalë të ndryshme ofenduese drejtuar kryeministrit.

Por, sipas tij fjalorët e tilla duhet të jenë në ndërgjegjen e vetë deputetëve dhe vetë ministrave.

“Sa i përket fjalorit parlamentar të themi të drejtën po më çuditni pak, sepse me dhjetëra herë në mos me qindra ju keni referuar kryeministrit, ‘hipokrit, mashtrues, gënjeshtar’”.

“Si deputetë opozitarë, pse nuk ma kujtuat në atë kohë që është joparlamentar. Kështuqe ju lutem, unë e di shumë mirë çfarë jam duke bërë, kur e toleroj këtë për ju dhe kur është toleruar vazhdimisht në Kuvend të Kosovës për këto fjalë nuk mund të ua ndërpresë fjalën, për këto terminologji që i përdorni duhet ta keni ndërgjegjen vetë, të keni kujdes se si e trajtoni kolegun, deputetin, edhe qeverinë janë të ndërsjellta këto”.

Diskursi dhe sjelljet, me të cilat përfaqësues të caktuar të partive politike shërbehen në paraqitje publike, e edhe në Kuvend është kritikuar vazhdimisht edhe nga shoqëria civile pasi sipas tyre, “reflekton mungesën e intelektualizmit në politikë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.