Guvernatori në Hawaii, thirrje turistëve: Nuk është kohë e mirë për të lëvizur

Guvernatori i Hawaii-t, David Ige, u ka bërë thirrje turistëve, të mërkurën e 25 gushtit, që të mos udhëtojnë në ishuj, ndërsa shteti përpiqet të kontrollojë COVID-19 – në mes të përhapjes në rritje të variantit shumë ngjitës Delta.

“Është një kohë e rrezikshme për të udhëtuar tani”, paralajmëroi David Ige, duke u kërkuar vizitorëve dhe banorëve që t’i kufizojnë udhëtimet e tyre vetëm në gjërat thelbësore.

“Unë i inkurajoj të gjithë të kufizojnë udhëtimet në Hawaii. Nuk është një kohë e mirë për të udhëtuar në ishuj”, tha ai.

Sipas të dhënave të “New York Times”, rastet me COVID-19 në Hawaii janë rritur me 36% në dy javët e fundit, ndërsa shtrimet në spital me 78%.

Përveç nxitjes së turistëve që të qëndrojnë larg, Guvernatori tha se kapaciteti në restorante ishte i kufizuar.

Por Ige nuk e ndaloi qëndrimin e jorezidentëve në ishuj, me argumentin se situata ishte më ndryshe në krahasim me vitin e kaluar – rregullat e rrepta të udhëtimit kërkonin karantinim. Në thelb, ky kufizim mbylli industrinë e turizmit në Hawaii.

“Vitin e kaluar në mars, kur fillimisht kërkova që vizitorët të shtyjnë udhëtimin në ishuj, ne pamë një ulje prej 60% të trafikut në Hawaii”, tha Ige. “Dhe pastaj, sigurisht, urdhërimi i karantinës së detyrueshme të të gjithë vizitorëve të ardhur hoqi udhëtimet në ishuj me 99.5%, në thelb 100% të udhëtarëve”.

Turistët janë kthyer në ishuj, pasi vaksinat janë gjerësisht të disponueshme dhe me udhëzime nga Qendrat për Kontrollin dhe Parandalimin e Sëmundjeve (CDC), duke thënë se njerëzit plotësisht të vaksinuar mund të udhëtojnë brenda vendit.

Guvernatori, po ashtu, u bëri thirrje njerëzve që të vaksinohen. Sipas të dhënave shtetërore në Hawaii, 62% e banorëve janë plotësisht të vaksinuar.

Ige tha se ai mbështeti kufizimet e fundit kundër COVID të miratuara nga kryetari i Bashkisë së Honolulu-s, Rick Blangiardi.

Kryebashkiaku njoftoi se rregullat, të cilat hyjnë në fuqi të mërkurën, do të kufizojnë grumbullimet në ambiente të mbyllura deri në dhjetë persona dhe ato në natyrë në 25.

Këto rregulla do të zbatohen për dasmat dhe ngjarjet e tjera.

“Kur shikojmë se sa e transmetueshme është Delta, me të vërtetë duhet t’i kontrollojmë këto grumbullime të mëdha”, tha Hiro Toiya, drejtori i menaxhimit të urgjencës së Honolulu-s.

Spitalet e shumta në ishullin Oahu, Honolulu, kanë mbushur shtretërit e tyre, ndërsa pacientët me COVID-19 po shtrohen në dhomat e urgjencës.

Në Honolulu u ngrit një tendë me 25 krevate jashtë qendrës mjekësore të Mbretëreshës-West Oahu, të premten, për të ndihmuar në përballimin e fluksit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.