Guardiola: Herën tjetër do luaj me nëntë sulmues

Manchester City barazoi me rezultat 1:1 në ndeshjen e parë të fazës së 1/8-ve të finales në Ligën e Kampionëve në udhëtim te Red Bull Leipzig.

Ky barazim u kritikua nga shumë analistë të futbollit, por trajneri i City-t, Pep Guardiola, u duk të jetë i kënaqur. Ai ironizoi me pyetjet e gazetarëve, derisa shtoi se ekipi i tij nuk mund ta fitojë secilën ndeshje.

“Ndoshta në ndeshjen e dytë do të jem i çmendur dhe do të luaj me nëntë sulmues”, tha Guardiola me shaka.

Trajneri spanjoll mund të jetë shfaqur në humor pas ndeshjes, por në kohët e fundit ekipi i tij disi e ka humbur atë ritmin sulmues që e kishte me herët.

Në fundjavë ata nuk shkuan përtej një barazimi me rezultat të njëjtë sikur mbrëmjen e kaluar ndaj Nottingham Forest, ku skuadra e Guardiola-s ishte duke fituar sikurse në Gjermani me shifrat 1:0, por në pjesën e dytë nuk e ruajtën avantazhin.

City kishte qenë në kontroll të plotë në 45 minutat e para, por gjeti vetëm golin e Riyad Mahrez. Guardiola tha se Liga e Kampionëve është një garë e vështirë.

“Ju prisni që ne të vijmë këtu dhe të fitojmë 0:5? Kjo nuk mund të jetë reale”, tha Guardiola për BT Sport pas ndeshjes.

“Kjo është një garë që në fazën e grupeve shumë ekipe të mëdha mbetën jashtë. Është e vështirë. Ne jemi një ekip i mirë dhe bëjmë shumë e shumë gjëra të mira. Ne vazhduam ta bëjmë këtë”, shtoi tekniku spanjoll.

[🎙️] Pep Guardiola: "Some people expect us to come and win 4-0, I'm sorry, it's not that easy!" #ManCity

pic.twitter.com/QOjUE4exIV

— City Zone (@City_Zone_) February 23, 2023

“Njerëzit presin që ne të vijmë këtu dhe të fitojmë 4:0. Më vjen keq që nuk jemi në gjendje ta bëjmë këtë”, thotë Guardiola.

Interesant është fakti, që trajneri spanjoll nuk e kreu asnjë zëvendësim në këtë ndeshje – gjë që rrallë herë mund të shihet në një ndeshje futbolli.

Ai tha: “Pashë që ekipi ishte i mirë, veçanërisht në mes. Në fund vendosa të vazhdoj me atë që kisha”.

Në fund të ndeshjes, Guardiola mblodhi lojtarët e tij për t’i mbajtur një fjalim, derisa në konferencë shpjegoi se çfarë u tha atyre.

“Unë thashë ‘pse rrini kokën ulur? Kokat lart, ishte mirë'”, tha Guardiola për atë moment.

“Shpresojmë që pas tre javësh të arrijmë në një gjendje të mirë. Mund të bëjmë më mirë. Duhet të rregullojmë disa gjëra dhe të gjejmë një mënyrë për t’i kaluar”, tha mes tjerash Pep Guardiola.

Kujtojmë që ndeshja e kthimit do të zhvillohet më 14 mars në “Ettihad Stadium”.

Para kësaj ndeshje, City do të përballet me Bournemooth, Neëcastle United dhe Crystal Palace në Premier Leauge dhe me Bristol City-n në FA Cup.

Kampionët në fuqi vazhdojnë ta ndjekin Arsenal-in e vendit të parë, pasi që aktualisht numërojnë 52 pikë në vendin e dytë, dy më pak se londinezët, por një ndeshje më shumë të zhvilluar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.