“Greqia e interesuar për situatën në Kosovë” – Dendias zhvillon bisedë telefonike me Kurtin  

Ndonëse Greqia është njëra nga pesë shtetet e Bashkimit Evropian e cila refuzon ta njohë pavarësinë e Kosovës, e njëjta është e interesuar për mbarëvajtjen e dialogut Kosovë-Serbi dhe dominimin e një atmosfere paqësore në Ballkanin Perëndimor, në veçanti në Kosovë.

Ministri i Punëve të Jashtme të Greqisë, Nikos Dendias, i cili zhvillon vizita të kohëpaskohshme në Kosovë, së fundmi ka zhvilluar një bisedë telefonike me kryeministrin e Kosovës, Albin Kurti.

Bisedën në fjalë e ka njoftuar vetë Dendias, përmes një cicërime në rrjetin e tij social në Twitter.

“Kam folur sot në telefon me kryeministrin e Kosovës, Albin Kurtin. Diskutimi u fokusua në zhvillimet e fundit në Veri të Kosovës dhe në dialogun Prishtinë-Beograd”, ka shkruar shkurtë ai pa dhënë detaje më të hollësishme.

Ι spoke over the phone today with Kosovar PM, A.Kurti. Discussion focused on recent developments in northern Kosovo & in the Belgrade-Pristina Dialogue. pic.twitter.com/IiXQXjcHyv

— Nikos Dendias (@NikosDendias) January 14, 2023

Për shkak të situatës së tensionuar në Veri të Kosovës, gjatë muajit dhjetor të vitit të kaluar, mediat greke kishin njoftuar se Dendias, komunikoi me shefen e Zyrës Ndërlidhëse të Greqisë në Prishtinë, si dhe me zyrtarë të detashmentit grek të KFOR-it.

Mediat greke kishin raportuar se kreu i diplomacisë greke – në kuadër të iniciativave që ndërmerr për uljen e tensionit, nëpërmjet vizitave të shpeshta në rajonin e Ballkanit Perëndimor – është në kontakt të rregullt edhe me të dërguarin e posaçëm të BE-së për Ballkanin Perëndimor, Miroslav Lajçak.

Burimet diplomatikë të mediave greke kishin theksuar se Greqia i kushton rëndësi parësore konsolidimit të paqes, sigurisë dhe stabilitetit në rajonin e Ballkanit Perëndimor dhe mbështet vazhdimin e dialogut Beograd-Prishtinë në favor të një zgjidhjeje të dakorduar reciprokisht të çështjeve të pazgjidhura, përfundimtare dhe ligjërisht të detyrueshme.

Edhe nëse përfshihet Amerika më shumë në dialog, Serbisë aq i bën – Vuçiç po sfidon BE-në dhe SHBA-në edhe për Ukrainën: Intervistë me profesorin amerikan Edward P. Joseph

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.