Google-i ka refuzuar të rivendosë llogarinë e një përdoruesi pasi ka shënuar gabimisht imazhet mjekësore të djalit të tij si material për abuzim seksual të fëmijëve.
Sipas ekspertëve, kjo është një grackë e pashmangshme e përpjekjes për të aplikuar një zgjidhje teknologjike për një problem shoqëror.
Ata kanë paralajmëruar prej kohësh për kufizimet e sistemeve të automatizuara të zbulimit të imazheve të abuzimit seksual të fëmijëve, veçanërisht pasi kompanitë përballen me presionin rregullator dhe publik për të ndihmuar në adresimin e ekzistencës së materialit të abuzimit seksual.
“Këto kompani kanë akses në një sasi jashtëzakonisht invazive të dhënash për jetën e njerëzve. Dhe ende ata nuk e kanë kontekstin se çfarë janë në të vërtetë jetët e njerëzve”, ka thënë eksperti Daniel Kahn Gillmor.
Ai ka shtuar se përdorimi i këtyre sistemeve nga kompanitë e teknologjisë që “veprojnë si përfaqësues” për zbatimin e ligjit i vë njerëzit në rrezik të “përfshihen nga fuqia e shtetit”.
I identifikuar si Mark, përdoruesi në fjalë bëri fotografi të ijeve të djalit të tij për t’i dërguar te mjeku. Ky i fundit e përdori atë imazh për të diagnostikuar djalin dhe për të dhënë antibiotikë.
Kur fotot u ngarkuan automatikisht në cloud, sistemi i Google-it i identifikoi ato si material të abuzimit seksual ndaj fëmijëve.
Dy ditë më vonë, Gmail-i i Mark dhe llogaritë e tjera në Google, u çaktivizuan për shkak të “përmbajtjes së dëmshme” që ishte “një shkelje e rëndë e politikave të kompanisë dhe mund të ishte e paligjshme”.
Më vonë, ai zbuloi se Google-i kishte shënuar një video tjetër që kishte në telefonin e tij dhe se departamenti i policisë së San Franciskos hapi një hetim ndaj tij.
Mark u lirua nga çdo shkelje kriminale, por Google-i ka thënë se do t’i qëndrojë vendimit të marrë.
Christa Muldoon, zëdhënëse e Google-it, ka thënë se punonjësit e kompanisë që shqyrtojnë këto materiale janë trajnuar nga ekspertë mjekësorë për të kërkuar probleme të tjera.
Por ata vetë nuk janë ekspertë mjekësorë dhe ekspertët mjekësorë nuk u konsultuan gjatë shqyrtimit të secilit rast.
Kjo është vetëm një mënyrë se si këto sisteme mund të shkaktojnë dëm, sipas Gillmor.
Sipas tij, teknologjia nuk është zgjidhja për këtë problem. Ajo mund të sjellë shumë probleme të reja, duke përfshirë krijimin e një sistemi të fuqishëm mbikëqyrjeje që mund të dëmtojë në mënyrë disproporcionale ata që janë në margjina.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
