Google-i ndalon shitjen e reklamave të personalizuara

Kompania teknologjike, Google, planifikon të ndalojë shitjen e reklamave bazuar në shfletimin e individëve nëpër faqet e shumta të internetit.

E përditshmja, The Wall Street Journal, shkruan se ndryshimi i ndërmarrë nga Google-i mund të nxisë trazira në industrinë e reklamave digjitale.

Kompania që e ka në pronësi Google-in, Alphabet Inc, ka deklaruar se po planifikon që vitin e ardhshëm të ndalojë investimin në teknologjitë e përcjelljes, të cilat identifikojnë në mënyrë unike përdoruesit e internetit teksa kalojnë nga një faqe në tjetrën.

Sipas The Wall Street Journal, vendimi i marrë mund të ndihmojë në largimin e industrisë së reklamave digjitale nga përdorimi i ndjekjes së individualizuar. Kjo pasi një qasje e tillë ka marrë kritika të shumta nga mbrojtësit e privatësisë dhe po përballet me vëzhgimin e rregullatorëve.

“Ndryshimi mund të reformojë biznesin e reklamave digjitale ku shumë kompani mbështeten te gjurmimi i individëve për të kategorizuar reklamat që do t’ju shfaqen, kjo për të matur efektivitetin e reklamave dhe për të ndaluar mashtrimet”, shkruan e përditshmja amerikane.

Sipas konsulentit të reklamave digjitale, Jounce Media, tregon se Google-i mësohet se përbën 52% të shpenzimeve globale të reklamave digjitale për vitin 2020. Shpenzimet numërohen të jenë 292 miliardë dollarë.

“Nëse reklamimi digjital nuk evoluon për të adresuar shqetësimet në rritje të njerëzve lidhur me privatësinë dhe mënyrën se si po përdoret identiteti i tyre personal, rrezikojmë të ardhmen e një rrjeti pa pagesë dhe të hapur”, ka thënë menaxheri i produktit të Google-it, David Temkin, në një postim në blog.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.