Gjykata regjistron statutin e Komisionit të Berishës

Gjykata e Tiranës, sot më 25 mars, ka regjistruar statutin e Komisionit të Rithemelimit për ndryshimet statutore të miratuara në Kuvendin e mbajtur më 11 dhjetor 2021.

Kështu, gjyqtari Agron Zhukri ka njohur ligjërisht punimet e Kuvendit të thirrur nga Sali Berisha më 11 dhjetor.

Tanimë kemi dy njohje të statuteve të PD-së, pasi disa ditë më parë u njohën vendimet e Kuvendit të PD-së të mbajtur më 17 korrik.

Kjo do të thotë se, çdo akt i organeve të PD-së, i ndërmarrë para hyrjes në fuqi të këtij Statuti dhe që bie në kundërshtim me dispozitat e tij, shfuqizohet automatikisht me hyrjen në fuqi të Statutit.

Pra, bie vendimi i Bashës për të përjashtuar Sali Berishën.

Në Statut parashikohet edhe një nen i veçantë për procesin e zgjedhjeve. Procesi nis me krijimin e organeve të reja dhe paraprihet nga një proces anëtarësimesh të reja dhe verifikimin e anëtarësisë ekzistuese.

Po ashtu, ndryshimet në Statut përfshijnë gati një parti të re, duke zhbërë strukturat drejtuese që ishin, me shkarkim të nënkryetarëve, me logo dhe vulë të re të partisë.

Cilat janë ndryshimet që tanimë janë njohur ligjërisht?

I pari është shkarkim i nënkryetarëve, të sekretarit të Përgjithshëm dhe funksionarëve të tjerë të PD-së.

Më pas, organet qendrore të partisë, përveç Kuvendit Kombëtar, ndalohen të ushtrojnë kompetencat deri më 22 mars 2022 – tanimë i shtyrë në muajin prill.

Po ashtu është shpallur pavlefshmëria e konstituimit të Kryesisë së PD-së, rrjedhimisht konsiderim nul të Kryesisë.

Një vendim tjetër është pavlefshmëria e vendimit të Kryesisë së partisë për të thirrur Kuvendin më 18 dhjetor.

Anulimin e thirrjes publike dhe të njoftimit të degëve të PDSH-së për mbajtjen e Kuvendit të 18 dhjetorit.

Ngritja e Komisionit të Rithemelimit të Partisë Demokratike të Shqipërisë me përbërje me 29 anëtarë.

Komisioni i Rithemelimit të PD, përgjegjës për organizimin dhe fillimin e proceseve referendare e zgjedhore në PD.

Thirrjen e mbledhjes së Kuvendit Kombëtar të Partisë Demokratike më 22 mars 2022.

Ndërkohë dy vendimet e fundit tashmë janë të pavlefshme pasi kanë të bëjnë me shkarkimin e Lulzim Bashës, i cili ka dhënë dorëheqjen.

Qëndrimi i PD-së

Më herët, sekretari i Përgjithshëm, Gazment Bardhi, në një dalje televizive theksoi se gjyqtari i caktuar për këtë çështje, Agron Zhukri, nuk mund të marrë në shqyrtim kërkesën e grupit të Rithemelimit për regjistrimin e Statutit të 11 dhjetorit, sepse për të nuk ka dosje.

Sipas ekspertëve ligjorë të PD-së, ky gjyqtar nuk mund të shqyrtojë një kërkesë të Rithemelimit për ndryshim të statutit të PD-së, bazuar në Kuvendin e 11 dhjetorit.

Kjo pasi ekziston vetëm një PD dhe dosja me ndryshimet statutore është ankimuar prej tyre në Apel, por që ende nuk dihet nëse është marrë në shqyrtim.

Po ashtu PD-ja, nëpërmjet përfaqësuesit të saj ligjor, Indrit Sefa, tha se ende nuk ishte dorëzuar kërkesa me ndryshimet e Kuvendit të 18-dhjetorit.

Çështja “Zhukri”

Nga ana tjetër, Gjykata e Tiranës ka rrëzuar kërkesën e Partisë Demokratike për përjashtimin e gjyqtarit Agron Zhukri nga çështja e shqyrtimit të statusit në Komisionin e Rithemelimit.

Gjyqtari Zhukri ishte përcaktuar me short, që të shqyrtojë çështjen e ndryshimeve të bëra në statutin e Partisë Demokratike në Kuvendin e thirrur nga ish-kryeministri Sali Berisha më 11 dhjetor.

Ai dha dorëheqjen nga gjykimi i çështjes. Kjo, me pretendimin se kishte konflikt interesi, por Gjykata vendosi të mos e pranojë dorëheqjen e tij.

“Kryetari i Gjykatës, pasi ka vlerësuar arsyet e paraqitura nga Zhukri, për përjashtimin e tij nga shqyrtimi i çështjes, ka vendosur mospranimin e kërkesës dhe vijimin e gjykimit të çështjes nga i njëjti gjyqtar”, shkruhej në njoftimin e Gjykatës së Tiranës.

Sipas Gjykatës, kjo është një kërkesë që bëhet mbi ligjin për partitë politike, gjë që nuk e bën të papajtueshëm me funksionin, ndaj nuk është pranuar dorëheqja.

Regjistrimi i 17 korrikut të Kuvendit të parë të Bashës

Ndërkohë, Gjykata e Tiranës të premten e 18 marsit ka regjistruar ndryshimet statutore gjatë Kuvendit Kombëtar të thirrur nga kryetari i PD-së, Lulzim Basha, më 17 korrik 2021.

Në kërkesën e PD-së u pasqyruan ndryshimet në statut dhe organet e reja.

Kjo lëvizje erdhi disa ditë pasi ish-lideri i PD-së, Sali Berisha të shtunën e 11 dhjetorit mbajti Kuvendin Kombëtar me rreth 5 mijë delegatë dhe mijëra mbështetës për të shkarkuar Lulzim Bashën.

Nga “Komisioni i Përkohshëm i Rithemelimit të PD-së” u miratuan disa ndryshime statutore dhe shkarkimi i Bashës.

Ndryshimet statutore të 17 korrikut 

Kuvendi i 17 korrikut solli 11 ndryshime, duke përfshirë zgjerimin e kryesisë me të tjerë anëtarë dhe shtimin e numrit të sekretarëve. Basha krijoi edhe Këshillin Koordinues të Qarkut për organizimet elektorale.

Ndryshimet e Kuvendit të Bashës kishin të bënin kryesisht me zgjerimin e Kryesisë, Sekretariatit dhe shtimit të strukturës së përhershme të Këshilli Koordinues i Qarkut, që do të ketë përgjegjësi në organizimin elektoral dhe aksionet e veprimtaritë politike të partisë në nivel qarku.

Në zgjerimin e Kryesisë është përfshirë edhe kryetari i Këshillit Kombëtar, kryetarin i Bordit Financiar, kryetari i Komisionit Zgjedhor dhe kryetari i Komisionit të Apelimit, Integritetit dhe Etikës.

Gjithashtu dhe Komisioni i Rithemelimit i Partisë Demokratike dërgoi në Gjykatën e Tiranës, më 15 dhjetor për regjistrim, ndryshimet statutore të votuara në Kuvendin e 11 dhjetorit i thirrur nga ish-kryetari i PD-së, Sali Berisha.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.