Gjykata e Lartë zbardh vendimin e plotë për 21 janarin: SPAK të rihetojë

Gjykata e Lartë ka zbardhur vendimin e saj të plotë sa i takon çështjes së 21 janarit, ku ka kërkuar që të rihetohet nga Prokuroria e Posaçme SPAK.

Gjykata e Lartë e vendosi këtë që me 12 mars, kur shpalosi vendimin e saj paraprak.

Kërkesa kryesore është bërë në Gjykatën e Lartë nga Rajmonda Nika, e veja e Aleks Nikës, i cili është një nga katër viktimat e protestës dhe mbi të cilin familja ka pretenduar që në krye të herës se ka pasur krim shtetëror në vrasjen e tij.

Më parë, SPAK pati vendosur të mos regjistronte procedim për 21 janarin, por familjarët e viktimave e ankimuan këtë vendim dhe e kundërshtuan SPAK-un.

Më 29 mars 2023, ishte Gjykata kundër Korrupsionit dhe Krimit të Organizuar, ajo e cila vendosi mospranimin e kërkesës së familjarëve dhe dhënien e të drejtës për SPAK që të mos e merrte përsipër dosjen.

Më 22 qershor 2023, ishte Apeli i GJKKO-së, i cili la në fuqi këtë vendim dhe rrëzoi ankimin e familjarëve.

Por, Gjykata e Lartë, ka qenë e prerë, duke vendosur pro familjarëve të viktimave.

Gjatë seancës, gjyqtari i çështjes ka replikuar ashpër me prokurorin e SPAK lidhur me vendimin e Prokurorisë dhe mospranimin që ka pasur.

Sokol Binaj, gjyqtari, i ka kërkuar llogari prokurorit Alfred Shehu nëse janë bërë veprime verifikuese nga SPAK.

Sipas Shehut, ka pasur verifikime të tilla, pasi ka pasur disa procedime në SPAK për këtë çështje dhe po ashtu është kërkuar informacion në Prokurorinë e Tiranës.

Çfarë thotë vendimi i plotë?

‘’Kolegji çmon të evidentojë – me këtë rast – se – në konformitet me përcaktimet e nenit 46 të Konventës Europiane për të Drejtat e Njeriut – Palët Kontraktuese (ku përfshihet edhe Shqipëria) – kanë detyrimin e konformimit ndaj vendimeve përfundimtare të Gjykatës (GJEDNJ), në çdo çështje ku ato janë palë, përmes ekzekutimit të tyre. Një nga efektet e kësaj procedure është se në rastet kur GJEDNJ konstaton shkelje, shteti i paditur ka detyrimin ligjor jo vetëm për të paguar personave përkatës shumat e dhëna si shpërblim i drejtë, në bazë të nenit 41, por edhe për të zgjedhur masat e përgjithshme dhe/ose individuale më të përshtatshme që duhet të ndërmerren për t’i dhënë fund shkeljes së konstatuar nga GJEDNJ. Në këtë kontekst, Kolegji sjell në vëmendje se përsa i përket masave individuale dhe zbatimin e nenit 46 të Konventës, në paragrafin 178 të vendimit, është shprehur se, “Gjykata vëren se hetimi penal është ende i hapur. Duke pasur parasysh këtë, ajo konsideron se autoritetet duhet të vazhdojnë (për aq sa kjo është e mundur) përpjekjet e tyre që synojnë zbardhjen e rrethanave të vdekjes së A.N. dhe identifikimin dhe ndëshkimin e personave përgjegjës, aty ku është e përshtatshme.” Rrjedhimisht, duke mbajtur parasysh (edhe) konkluzionet e vendimit të Gjykatës Europiane për të Drejtat e Njeriut, të datës 14 Nëntor 2023 (çështja Nikaj kundër Shqipërisë), lidhur me zgjidhjen efektive dhe për forcën detyruese dhe ekzekutimin e vendimeve të kësaj Gjykate, edhe për këtë shkak, Kolegji konsideron se vendimet e gjykatave të posaçme (gjyqtarit për hetimet paraprake pranë Gjykatës së Posaçme të Shkallës së Parë dhe të Gjykatës së Posaçme të Apelit) duhet të ndryshohen, duke u urdhëruar Prokuroria e Posaçme kundër Korrupsionit dhe Krimit të Organizuar për të regjistruar procedimin penal, për kallëzimin e datës 16.02.2023, me qëllim kryerjen e hetimeve të mëtejshme, duke mbajtur në konsideratë edhe vendimmarrjen e mësipërme të GJEDNJ”.

PËR KËTO ARSYE,

”Kolegji Penal i Gjykatës së Lartë, në konformitet me përcaktimet e neneve 291, pika 4 dhe 441, pika 1, shkronja “dh”, të Kodit të Procedurës Penale”

VENDOSI:

Ndryshimin e vendimit nr. 92, datë 21.06.2023, të Gjykatës së Posaçme të Apelit për Korrupsionin dhe Krimin e Organizuar dhe të vendimit nr. 107, datë 29.03.2023, të Gjykatës së Posaçme të Shkallës së Parë për Korrupsionin dhe Krimin e Organizuar – gjyqtarit për hetimet paraprake pranë asaj gjykate dhe zgjidhjen përfundimisht të çështjes, duke urdhëruar Prokurorinë e Posaçme kundër Korrupsionit dhe Krimit të Organizuar për të regjistruar procedimin penal për kallëzimin e datës 16.02.2023’’, thuhet në vendim.