Gjuriç-i i ankohet Borrell-it për pozitën e serbëve në Kosovë

Ministri i Punëve të Jashtme i Serbisë, Marko Gjuriç, të mërkurën, ka takuar Përfaqësuesin e Lartë të Bashkimit Evropian për Politikë të Jashtme dhe të Sigurisë, Josep Borrell, me të cilin ndër të tjera ka diskutuar edhe për procesin e dialogut dhe pozicionin e serbëve në Kosovë.

Në një prononcim për media pas takimit, Gjuriç, ka pretenduar se pozita i komunitetit serb në Kosovë është i tmerrshëm.

“Në takim me Borrell-in theksova faktin se diskriminim sistematik ndaj serbëve po vazhdon. Diskutuam shumë aspekte specifike të shkeljes së të drejtave kolektive dhe politike të serbëve në Kosovë”, ka pretenduar ai.

Takimi i nivelit të lartë të dialogut i 26 qershorit përfundoi pa ndonjë rezultat konkret, meqë kryeministri i Kosovës, Albin Kurti refuzoi takimin me presidentin e Serbisë, Aleksandar Vuçiç.

Kurti parashtroi tri kërkesa të cilat duhen plotësuar për vazhdimin e procesit të normalizimit.

Formalizimi i Marrëveshjes Bazë, tërheqja e letrës zyrtare të ish-kryeministres së Serbisë dorëzuar Bashkimit Evropian dhe dorëzimi i Milan Radojiçiç dhe grupit të tij paramilitar terrorist tek autoritetet kosovare, ishin tri kushtet e Kurtit.

Edhe takimi i nivelit të kryenegociatërove përfundoi pa ndonjë rezultat konkretë.

Kosova dhe Serbia gjatë vitit 2023 u dakorduan për Marrëveshjen Bazë dhe aneksin e zbatimit të saj, por që nga ajo kohë deri më sot ujdia s’u zbatua në terren.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.