“Ka vetëm një rrugë që Rusia të mendojë lirimin e Alexei Navalny-t nga burgu. Përdorimi i sanksioneve dhe gjuhës së forcës”.
Kështu mendon aleati më i ngushtë i opozitarit rus, Leonid Volkov. Ai, do të zhvillojë një takim me politikanë evropianë në Bruksel, të dielën e 21 shkurtit.
Ministra të Jashtëm të vendeve anëtare në Bashkimin Evropian, pritet të mblidhen të hënën për të vendosur sanksione mbi aleatët e Vladimir Putin-it dhe Rusisë. Kjo, do të jetë përgjigja perëndimore ndaj burgosjes së Navalny-t.
Volkovi njiher ndryshe edhe si “shefi i kabinetit” të kritikut të Kremlinit. Për agjencinë e lajmeve Reuters, ai ka cilësuar se “Putin-i do të merrte në konsideratë lirimin e Navalny-t, vetëm nëse goditet me sanksione”.
“Putin-i është diktator, por është shumë racional. Nëse të këqijat e burgosjes së Navalny-t do të peshojnë më shumë se të mirat, ai do të ndryshojë vendimin e tij dhe do ta lirojë”.
Sipas Volkov-it, “nëse aleatët e presidentit rus ndëshkohen, kjo mund të jetë e rrezikshme edhe për të”. “Ndoshta Putin-i mund të mos trembet nga sanksionet. Gjithsesi, kjo është gjëja më e mirë që Evropa mund të bëjë në këtë çast”, përmbyll ai.
Austria kërkon sanksione në bllok
Austria është shteti i parë që kërkon sanksionime në bllok ndaj Rusisë. Këtë fakt e ka konfrimuar kryediplomati austriak, Alexander Schallenberd për gazetën gjermane Welt Am Sonntag.
Sipas tij, “BE-ja duhet të përdorë fuqitë e saj për të dënuar abuzimet ndaj të drejtave të njeriut”. “Këtu përfshihen edhe masat bazuar në kornizën e sanksioneve kundër regjimeve, të cilat sapo janë krijuar”, shton Schallenberg-u.
“Ne presim mbështetje masive mbi këtë çështje. Komentimi i thjeshtë i situatës në Rusi nuk zgjidh asgjë. Duhet të përballemi me realitetin rus dhe jo thjeshtë të vëzhgojmë”.
Është bërë me dije ndërkohë se pjesëmarrës në takimin e vendeve të BE-së, do të jenë edhe zyrtarë të shteteve të tjera. Ndër ta, i pranishëm do të jetë Sekretari i Shtetit në SHBA, Antony Blinken.
Nuk dihet gjithsesi nëse Amerika do të përfshihet apo jo në sanksionimin e Rusisë për çështjen Navalny. Vetë Blinken, ka kërkuar më parë lirimin e menjëhershëm të tij dhe e ka cilësuar dënimin si politik.
Navalny-Putin
Çështja e Alexei Navalny-t tërhoqi vëmendjen e gjithë botës në gusht 2020, kur ai u helmua me një agjent kimik rresptësisht të ndaluar, Novichok.
Një përgjim i Bellingcat nxorri zbuluar një agjent të Shërbimeve Sekrete Ruse, i cili pranoi se këta të fundit ishin urdhëruar të helmonin Navalny-n.
Opozitari rus qendroi në Gjermani për pesë muaj. Pavarësisht rrezikut të jetës dhe qëndrimit në koma, ai mundi të riaftësohej.
Më 17 janar, Navalny u kthye në Moskë, ku u arrestua menjëherë pas zbritjes nga avioni. Dy fundjavat pasuese, do të shënonin ndër protestat më masive në Rusi gjatë dy dekadave të fundit.
Më 2 shkurt, Navalny u dënua nga Gjykata e Moskës me 2 vite e 8 muaj burg. Mbi 10 mijë njerëz janë arrestuar gjatë protestave për lirimin e tij.
Bashkësia ndërkombëtare ka kërkuar disa herë lirimin e menjëhershëm të rivalit të Putin-it. Vendosja e sanksionieve është paralajmëruar si hap i radhës ndaj Kremlinit.
Albanianpost.com
