Gjilani “blindon” zonën evropiane, Ferizaj e “fundos” Drenicën

Gjilani ka shënuar fitore shumë të rëndësishme në ndeshjen e javës së 32-të në Albi Mall Superligën e Kosovës në futboll, duke e mposhtur Dukagjinin me rezultat minimal 2:0.

Goli i parë në këtë ndeshje u shënua në minutën e 28-të, kur Mevlan Zeka e kaloi Gjilanin në epërsi pas një aksioni të bukur.

Goli i radhës përsëri u shënua nga Zeka, por në minutën e tetë shtesë të ndeshjes.

Me këtë fitore, Gjilani tani ka 50 pikë në vendin e tretë (vend që e dërgon në Evropë), tetë më shumë se Prishtina e vendit të katërt. Ndërsa, Dukagjini mban vendin e pestë me 41 pikë.

Në ndeshjen tjetër, Ferizaj gjithashtu mori një fitore shumë të vlefshme, duke e mposhtur Drenicën me rezultat 2:0.

Kjo humbje njëkohësisht ishte edhe një “fundosje” për skuadrën nga Skenderaj, pasi tashmë me një këmbë është në Ligën e Parë të Kosovës, duke qenë se vetëm matematika e mban në Superligë.

Pjesa e parë nuk dhuroi gola, derisa në të dytën vendasit realizuan dy herë.

Albin Krasniqi e hapi sfidën në minutën e 52-të, derisa katër minuta më vonë mysafirët mbetën me një futbollist më pak në fushë pas daljes me të kuq të Lukman Hussein.

Megjithatë, 10 minuta më vonë, ekipet u barazuan sa i përket terenit në fushë, kur edhe Enhar Cakolli u përjashtua me të kuq nga ana e ferizajasve.

Në minutën e 73-të, Betim Haxhimusa e “vulosi” fitoren për Ferizajn, duke shënuar për 2:0.

Pas kësaj fitoreje, Ferizaj është në vendin e nëntë (parafundit, zonë e rënies) me 34 pikë, aq sa ka edhe Trepça’89 e vendit të tetë (zonë e barazhit) të cilët janë duke u mposhtur në udhëtim te Malisheva.

Kujtojmë që ndeshja mes Malishevës dhe Trepçës’89 ka filluar me 25 minuta vonesë, për shkak të problemeve me një portë, që dyshohej të ishte më e vogël se sa duhej.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.