Gjashtë kandidatura zyrtarizohen në garën vendore për kryeqytetin

Bashkia e Tiranës do të ketë një inflacion kandidaturash për garën vendore të 14 majit, plot gjashtë si asnjëherë më parë në historinë e zgjedhjeve lokale.

Përfaqësuesi i Frontit të Majtë, Marko Dajti, do të jetë kandidati i gjashtë dhe më i fundit në garë për kryebashkiakun e kryeqytetit.

Vendimi u mor të mërkurën e 5 prillit në seancën publike të Komisionit Qendror të Zgjedhjeve.

E fundit në maratonën kryeqytetase për administrimin e Tiranës ishte ish-deputetja e Partisë Demokratike, Lajla Përnaska.

Kjo e fundit, do të kandidojë në zgjedhjet lokale nën siglën e Partisë Drejtësi, Integrim dhe Unitet (PDIU).

Ish-anëtarja e Komisionit Parlamentar të Punëve të Jashtme dorëzoi të mërkurën kërkesën për regjistrim në Komisionin Qendror të Zgjedhjeve (KQZ).

Kryetari aktual i Bashkisë së Tiranës, Erion Veliaj u konfirmua më herët si kandidat i Partisë Socialiste.

Ishte kryeministri Edi Rama, i cili vlerësoi kryebashkiakun për punën e bërë në Tiranë dhe për optimizmin e pashërueshëm siç e cilësoi ai, duke e konfirmuar atë si kandidat unik të socialistëve për Bashkinë e Tiranës.

Duke folur në prezantimin e strategjisë së zhvillimit të Tiranës, Rama tha se Bashkia e Tiranës është sektor prioritar i veçantë.

“Të kesh qenë kryetar i Bashkisë së Tiranë dhe të shohësh këtë prezantim, e ke të pamundur të mos thuash me vete paç fatin e Lali Erit. Bashkia e Tiranës është sektor prioritar i veçantë. Nuk dua të zgjatem më shumë, ju falënderoj shumë për mundësinë. Falenderoj të gjithë ata qa që kanë kontributin e tyre në këto që pamë dhe natyrisht përgëzoj dhe Erionin për drejtimin, për punën dhe për optimizmin e tij të pashërueshëm”, deklaroi kreu i Qeverisë.

Ndërsa kryebashkiaku Veliaj falënderoi kryeministrin për mbështetjen e vazhdueshme ndaj zhvillimit të vendit.

“Shumë faleminderit Edi Ramës për mbështetjen dhe për gjithë energjinë e pafundme për të ecur përpara”, shtoi i mandatuari prej tetë vitesh në këtë detyrë.

Kundërshtari i tij kryesor vjen nga radhët e Partisë Demokratike, por jo me logon e selisë blu zyrtare.

Edhe pse në frymën e përçarjes, selia blu zyrtarizoi më 5 dhjetor një rezultat që ishte i pritshëm në vazhdën e promovimeve brenda kësaj force politike.

Belind Këlliçi u përzgjodh me konsensus nga Primaret e Partisë Demokratike (me aprovimin e Partisë së Lirisë gjithashtu) si kandidati i duhur për të mposhtur kryebashkiakun e Tiranës, Erion Veliaj.

Dy prej premtimeve kryesore të tij deri më tani kanë qenë “transporti publik falas” dhe programi për uljen dhe reduktimin e taksave e tarifave vendore.

Pedagogu i Shkencave Politike, Arlind Qori, do të jetë një tjetër garues për kreun e Bashkisë Tiranë, nga radhët e një formacionit të ri politik të formuar, njohur si “Lëvizja Bashkë”.

Kështu është njoftuar nga vetë lëvizja politike, e cila ende nuk është regjistruar zyrtarisht në Gjykatën e Tiranës, pas një ngërçi të hasur me gjykatësin Agron Zhukri, i cili nuk e ka dhënë ende vendimin mbi çështjen.

Kandidaturën, Qori e ka shpallur përpara simpatizantëve të lëvizjes, gjatë një takimi të zhvilluar me ta pasditen e 27 shkurtit.

“Kandidati i Lëvizjes BASHKË për kryetar të Bashkisë së Tiranës do të jetë Arlind Qori, me profesion pedagog i shkencës politike, aktivist prej 12 vjetësh dhe prej dhjetorit të vitit të shkuar edhe bartës i përgjegjësisë së kryetarit të Lëvizjes Bashkë”.

Kështu shkruhej në faqen zyrtare të lëvizjes në Facebook.

Kandidati zyrtar i Partisë Demokratike që do të garojë për Bashkinë e Tiranës do të jetë Roland Bejko.

Vendimi u mor nga Kryesia të dielën e 26 marsit nga kryetari i komanduar i Partisë Demokratike, Enkelejd Alibeaj.

Demokrati Bejko ka qenë për një periudhë të gjatë kohore kryetar i PD-së në Gjirokastër dhe më pas prefekt në Berat.

Ai njihet për qëndrimet e tij kundër Sali Berishës, sidomos protestës së agravuar të 8 janarit të vitit që lamë pas.

Deri më tani, klima e pazakontë opozitare ka mbushur ballinat e mediave dhe të kronikave, por gara e vërtetë për zgjedhjet vendore ende nuk ka nisur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.