Gërvisht dhe ndrysho!

Siguria ushqimore supozohet të jetë parimi kryesor i bizneseve që tregtojnë produkte konsumi për qytetarët shqiptarë.

Mirëpo, në praktikë ndodh ndryshe. Produkte të shumta ushqimore vijojnë të shiten në supermarkete edhe pasi u ka kaluar data e skadencës. Duke u shndërruar kështu në një rrezik potencial për shëndetin e çdo konsumatori.

Albanian Post kontaktoi me Autoritetin Kombëtar të Ushqimit (AKU), për një informacion më të detajuar në lidhje me mashtrimet që kryhen me produktet ushqimore.

“Mashtrimi ushqimor është një koncept i ri, i futur së fundmi në mënyrën procedurale të AKU-së, në vijim edhe të ndryshimeve në Kodin Penal, konkretisht Neni 288/ a, b, c, ç dedikuar mashtrimit ushqimor dhe elementeve që përbëjnë një kundërvajtje të tillë”, tregon AKU-ja për AP-në.

Në periudhën e pandemisë, kur kujdesi ndaj asaj se çfarë konsumojmë është rritur ndjeshëm, edhe frika ndaj produkteve të skaduara sa vjen e rritet.

“Për qarkun e Tiranës, nga fillimi i vitit dhe deri më tani ka pasur 15 sinjalizime për tregtim produktesh me afat të tejkaluar. Për të gjitha është bërë verifikimi në terren dhe nuk është konstatuar kjo problematikë”, shprehen ata.

Por, pavarësisht se AKU-ja nuk raporton për shkelje të tilla, qytetarët shprehen se nuk kanë besim tek ajo çfarë tregtohet.

“Në blerjet e përditshme, kam hasur pafund raste, kur ushqimet e blera më kanë rezultuar të skaduara. Nuk jam ankuar askund, sepse e di që nuk do të merret parasysh”, shprehet qytetarja, Sabrie Cahani.

Në tregjet shqiptare nuk është e vështirë të gjenden produkte që data e skadencës u fshihet lehtësisht.

“Neni 12, pika 2, përcakton se të dhënat e përmendura në etiketë duhet të jenë lehtësisht të kuptueshme, të lexueshme, të shikueshme dhe të pashlyeshme që nënkupton mosfshirjen”.

Ky është rregulli, që ka AKU-ja për produktet që dalin në treg. Nga ana tjetër, AKU-ja vazhdon të deklarojë se nuk kanë verifikuar asnjë rast të kësaj natyre.

Kështu që, AP-ja vendosi të testonte dy produkte të rastësishme ushqimore. Por cili ishte rezultati?

Në më pak se disa sekonda, nga datat nuk mbeti asnjë gjurmë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.