Garazhi nënujor i biçikletave zgjidh një problem të stacionit të Amsterdamit

Nën ujërat e pastër dhe varkat pranë stacionit qendror të Amsterdamit është një arritje e jashtëzakonshme inxhinierike.

Bëhet fjalë për një garazh nënujor për shtatë mijë biçikleta.

Garazhi, i cili hapet më 26 janar, është rezultat i një projekti katërvjeçar, prej 60 milionë eurosh për të pastruar pirgjet e biçikletave të ndryshkura dhe për të instaluar një sërë hapësirash parkimi të pastra e të sigurta nën tokë.

Një vendkalim lëvizës ju çon lart në stacionin e trenit, ku më shumë se 200 mijë udhëtime fillojnë dhe mbarojnë çdo ditë.

Në anën e portit IJ është një tjetër park i ri për katër mijë biçikleta të tjera, i ndërtuar mbi shtylla në tokë të re në IJ, centimetra mbi linjën e metrosë Veri-Jug.

Garazhi ka drita të kuqe dhe jeshile për të treguar nëse hapësirat janë të disponueshme dhe nga prilli një sistem dinamik do të fillojë t’u tregojë udhëtarëve se cili park për biçikleta ka vend dhe sa hapësira janë të lira.

“Stacioni qendror është një nga vendet më të ngarkuara në Amsterdam”, ka dalluar menaxheri i projektit të biçikletave të bashkisë së Amsterdamit, Pieter Visser.

“Shumë motoçiklistë përdorin këtë hapësirë të çmuar publike për të pedaluar dhe parkuar. Bashkia zgjodhi të lehtësojë parkimin nëntokësor të biçikletave për t’iu kthyer hapësirën publike këmbësorëve, turistëve dhe personave me aftësi të kufizuara”, ka shtuar ai.

Në këtë vend të vogël ka më shumë biçikleta se sa njerëz, rreth 23.4 milionë biçikleta, krahasuar me një popullsi prej 17.8 milionë banorësh.

Çiklizmi është forma kryesore e transportit në qytete të tilla si Amsterdami. Dhe ekspertët e çiklizmit e përshëndetën projektin me entuziazëm.

Marco te Brömmelstroet ka thënë se çelësi i suksesit të tij ishte në lidhjen e formave të lëvizshmërisë.

“Është një projekt i mrekullueshëm sepse nuk është një projekt për çiklizëm. Kjo e bën të dukshëm faktorin e vërtetë të suksesit në lëvizjen holandeze: kombinimin biçikletë-tren”, ka thënë ai.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.