Fyrjet ndaj UÇK-së – OVL-ja proteston më 12 qershor

Të shtunën e ardhshme në Prishtinë Organizata e Veteranëve të Luftës, të Ushtrisë Çlirimtare e Kosovës, do të protestojnë, pasi siç kanë thënë nga kjo organizatë “fyerjet që po i bëhen UÇK-së dhe çlirimtarëve”.

Kryetari i OVL të UÇK-së, Faton Klinaku, përmes një postimi në Facebook ka bërë të ditur se protesta do të mbahet përmes aktiviteteve dhe artit.

“Kemi nderin të ju njoftojmë që me datën 12.06.2021, ora 11, në sheshin “Skënderbeu” në Prishtinë, do të mbahet aktivitet protestues përmes artit”.

Ai  ka thënë se kjo protestë po mbahet shkaku i fyerjeve që po bëhen ndaj UÇK-së.

“Për shkak të fyerjeve që po bëhen ndaj UÇK-së dhe në përkrahje të çlirimtarëve që gjenden padrejtësisht në dhomat e specializuara në Hagë” ka shkruar Klinaku.

Sipas Klinakut “këtë përvjetor të ditës, po e presim pa prezencën e krerëve të Ushtrisë Çlirimtare të Kosovës, prandaj e kemi obligim moral e njerëzor që në këtë ditë të veçantë për vendin tonë, të jemi në përkrahje të tyre. Dil dhe shkruaj mbishkrimin “Me ju çlirimtarë” dhe formo figurat e nismëtarëve të Lirisë” ka shkruar mes tjerash Klinaku.

Kryesia e Organizatës së Veteranëve të Luftës së UÇK-së, në mbledhjen e mbajtur të shtunën lidhur me situatën aktuale në Kosovë, është shprehur se Institucionet e Kosovës nuk po i përfillin vlerat kombëtare.

“Vërehet një tendencë e akuzave ndaj krerëve të UÇK-së, nga Kryeministri Kurti, Ministrja e Jashtme Gërvalla-Schwarz, e tani Ministri i Brendshëm, Xhelal Sfeçla”.

“Rasti i arrestimit dhe dhunës së ushtruar kundër, Faik Fazliut, nuk duhet të trajtohet  dhe të dënohet vetëm nga OVL e  UÇK-së, por edhe nga partitë, ndërsa çështje t’i mbetet organeve të drejtësisë për shqyrtim dhe veteranët do ta respektojnë çdo vendim të tyre”, është thënë në këtë mbledhje të OVL.

Mbrëmjen e së shtunës në Prizren, Policia e Kosovës ka arrestuar veteranin e UÇK-së Faik Fazliun, pasi sipas organeve të rendit, kishte kanosur një zyrtar policor deri sa ata bashkë me Agjencinë e Ushqimit dhe Veterinës po mbyllnin një kafiteri, për mos respektim të masave anti COVID.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.