FSK-së i shtohen edhe 190 rekrutë të rinj

Të premten, është mbajtur ceremonia e betimit të 190 rekrutëve të rinj të Forcave të Sigurisë së Kosovës, në kazermën “Skënderbeu”.

Ata u betuan solemnisht në prani të presidentes së Republikës së Kosovës, Vjosa Osmani, kryeministrit Albin Kurti, ministrit të Mbrojtjes, Armend Mehaj, Komandantit të FSK-së, gjenerallejtënant Bashkim Jashari, zyrtarëve vendorë e ndërkombëtarë si dhe familjarëve të tyre.

Presidentja Osmani u shpreh se me rekrutimin e këtyre rekrutëve të rinj FSK përmbyllë një vit jashtëzakonisht të suksesshëm.

“Secila ditë e certifikimit të ri është e veçantë për ushtrinë dhe për shtetin tonë sepse krahas rritjes së kapacitetit, FSK po ecën me hapa të sigurt drejt përfundimit të procesit të tranzicionit”, deklaroi Osmani.

Kryeministri Albin Kurti, gjatë fjalimin të tij theksoi se “Qeveria e Kosovës dhe Ministria e Mbrojtjes e vlerësojnë mbrojtjen dhe sigurinë si shtyllë jetike të shtetit”.

Ndërkaq, shtoi se do të vazhdojë të mbështesë FSK-në dhe të përkrah aleatët tonë strategjikë, Shteteve të Bashkuara të Amerikës dhe vendeve tjera të NATO-s si dhe ta modernizojmë forcën dhe ta bëjnë operacionale dhe të ndërveprueshme me ushtritë e vendeve partnere.

Në përfundim të kësaj ceremonie, komandantja e Komandës së Doktrinës dhe Stërvitjes, gjenerabrigade Irfete Spahiu i uroi rekrutët për suksesin e dëshmuar gjatë trajnimit si dhe shprehu besimin për shërbim dhe karrierë të suksesshme në uniformën e FSK-së.

Certifikimi i 190 ushtarëve të rinj është proces në kuadër të ngritjes dhe zhvillimit të aftësive dhe kapaciteteve të nevojshme operacionale, bazuar në Planin Gjithëpërfshirës të Tranzicionit të FSK-së.

Më 10 nëntor, 193 rekrutë të rinj të Forcës së Sigurisë së Kosovës (FSK), kanë qenë duke e ndjekur trajnimin ushtarak në Komandën e Doktrinës dhe Stërvitjes në Ferizaj për tu bërë ushtarë të Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.