Lajme

Frika për më shumë se një milion raste me COVID në Korenë e Veriut


Në Korenë e Veriut, udhëheqësi Kim Jong-un ka kritikuar zyrtarët e shëndetësisë dhe ka urdhëruar ushtrinë të ndihmojë në shpërndarjen e ilaçeve.

Lëvizja vjen pasi një valë e rasteve me COVID po përfshin vendin. Mbi një milion njerëz janë të sëmurë nga të ashtuquajturat “ethe”. Kurse rreth 50 persona kanë ndërruar jetë.

Megjithatë është e paqartë se sa prej atyre rasteve të dyshuara kanë rezultuar pozitivë me COVID.

Koreja e Veriut ka kapacitet të kufizuar testimi, kështu që pak raste janë konfirmuar.

Ka të ngjarë që vendi të jetë veçanërisht i ndjeshëm ndaj virusit për shkak të mungesës së vaksinimeve dhe një sistemi të dobët të kujdesit shëndetësor.

Sakaq, është vendosur një bllokim mbarëkombëtar.

Referuar medias shtetërore, Kim ka drejtuar një takim urgjent të Byrosë Politike në fundjavë, ku ai ka akuzuar zyrtarët për prishje të shpërndarjes së rezervave kombëtare të mjekësisë.

Ai ka urdhëruar që “forcat e fuqishme” të trupit mjekësor të ushtrisë të ndërhyjnë për të “stabilizuar menjëherë furnizimin me ilaçe në qytetin e Phenianit”.

Javën e kaluar, vendi ka njoftuar rastet e para të konfirmuara me COVID.

Vitin e kaluar, komuniteti ndërkombëtar ofroi furnizimin e Koresë së Veriut me miliona AstraZeneca dhe vaksina të prodhuara në Kinë.

Por Pheniani ka pretenduar se e kishte kontrolluar COVID-in duke mbyllur kufijtë në fillim të janarit 2020.

Koreja e Veriut ndan kufijtë tokësorë me Korenë e Jugut dhe Kinën, të cilat të dyja kanë luftuar me shpërthimet. Tani, Kina po përpiqet të përballojë një valë Omicron me bllokime në qytetet më të mëdha.

Ndërsa Koreja e Jugut ka ofruar të dërgojë ndihmë të pakufizuar në Veri nëse kërkohet, duke përfshirë doza vaksinash, punonjës shëndetësorë dhe pajisje mjekësore.

Kim e ka quajtur shpërthimin e përhapur me shpejtësi të COVID-19 një “katastrofë të madhe”.

Përveç ndikimit të drejtpërdrejtë shëndetësor, frika është ngritur për prodhimin e ushqimit në Korenë e Veriut.

Vendi pësoi një uri brutale gjatë viteve 1990 dhe Programi Botëror i Ushqimit vlerëson se 11 milionë nga 25 milionë banorët e vendit janë të kequshqyer.

Nëse punëtorët e bujqësisë nuk janë në gjendje të kujdesen për fushat, pasojat do të jenë jashtëzakonisht serioze.

Marrë nga “BBC”, përshtatur për “Albanian Post”.

 

/Albanianpost.com


Lajmet kryesore