Franca e barazon rezultatin brenda dy minutave ndaj Argjentinës, ndeshja shkon në vazhdime
Franca nuk është dorëzuar, përkundër që ishte në disavanazh prej dy golave ndaj Argjentinës në finalen e Kupës së Botës, duke e barazuar rezultatin brenda dy minutave.
Ndeshja nisi me një ritëm dukshëm më të lartë të argjentinasve, të cilët kërkonin vazhdimisht golin.
Angel Di Maria e pati një rast shumë të mirë në minutën e 18-të, por në hyrje të zonës ai goditi mbi portë.
Ndërkohë, në aksionin pasardhës, Di Maria e fiton një penallti, pasi në zonë u shty nga Ousmane Dembele.
Si zakonisht, Lionel Messi e mori përsipër për ta ekzekutuar 11-metërshin, duke u treguar i saktë për 1:0.
Ky ishte goli i gjashtë i Messi-t në këtë Botëror, ndërsa 12 ka realizuar në total në të gjitha Kampionatet e Botës ku ka marrë pjesë.
Pas këtij momenti, argjentinasit nuk u ndalën duke e kërkuar edhe golin e dytë.
Dhe, atë e gjetën në minutën e 36-të, kur pas një kundërsulmi fantastik, Alexis Mac Allister e gjen krejtësisht të vetëm Angel Di Maria-n, i cili me një parabolë të lehtë shënoi për 2:0.
Deri në fund të pjesës së parë raste konkrete më nuk pati, por duhet theksuar se trajneri i Francës, Didier Deschamps ka bërë dy zëvendësime.
Ka larguar nga loja Olivier Giroud dhe Ousmane Dembele, i futi Marcus Thuram dhe Randal Kolo Muani.
Pjesa e dytë gjithashtu nisi shumë më mirë për Argjentinën, ku francezët nuk po arrinin të tregonin asgjë.
Pjesë e dobët gjithashtu ishte edhe Kylian Mbappe, i cili nuk ishte vërejtur deri në minutën e 80-të, atëherë kur iu nevojitën vetëm 2 minuta, apo më saktë, 97 sekonda për ta barazuar rezultatin.
Të parin e shënoi në minutën e 80-të nga penalltia e fituar nga Kolo Muani, ndërsa në aksionin pasardhës e shënoi edhe të dytin pas një asistimi të Marcos Thuram.
Pas këtyre golave, ndeshja ishte e mbyllur nga dyja skuadrat, të cilat prisnin fishkëllimën e fundit të gjyqtarit për të vazhduar në vazhdime.
Vlen të theksohet se Messi e pati një rast shumë të mirë krejt në fund të ndeshjes, por goditjen e tij të fortë mezi e priti Hugo Lloris.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
BE thotë se nevojiten më shumë burime për të luftuar dezinformimin rus – Ballkani i prekur
-
Erion Veliaj paraqitet në SPAK për inceneratorin e Tiranës
-
IDF finalizon planet e Rafah, 72 orët vendimtare
-
Regjistrimi i serbëve në Veri do të shfaqte manipulimet me listat zgjedhore – “hezitimi, rezultat i institucioneve të Kosovës”