Forcat ukrainase rrëzojnë dy raketa balistike teksa Kievi tronditet nga shpërthimet

Gazetarët e “AFP”-së kanë raportuar së fundmi se kanë dëgjuar disa shpërthime në qendër të Kievit.

Raportimi i tyre vjen pasi zyrtarët u kërkuan banorëve atje të strehoheshin dhe pasi forcat ajrore të Ukrainës thanë se rrëzuan dy raketa balistike që synonin kryeqytetin ukrainas.

Raketat u lëshuan nga gadishulli i okupuar i Krimesë dhe u rrëzuan rreth orës 10:30 të mëngjesit me orën lokale, ka bërë me dije komandanti i Forcave Ajrore, gjeneral Mykola Oleschuk.

Shpërthimet u dëgjuan rreth orës 10:30 pasi thuajse një duzinë njerëz u plagosën në një sulm me dron rus në Ukrainën jugore gjatë natës dhe një zjarr shpërtheu në një termocentral të madh rus pas një sulmi me dron ukrainas.

“Shpërthime në Kiev. Shkoni menjëherë në strehimore”, shkroi në mediat sociale kryetari i bashkisë së Kievit, Vitali Klitschko, duke shtuar në një postim të mëvonshëm se shërbimet e urgjencës ishin dërguar në tre rrethe të kryeqytetit.

Kreu i administratës ushtarake të Kievit ka thënë se një raketë ruse kishte dëmtuar një ndërtesë banimi në lagjen Pechersky.

“Përsëri këtë mëngjes Rusia po sulmon Ukrainën me raketa hipersonike. Shpërthime të forta në Kiev”, shkroi ambasadorja e Shteteve të Bashkuara të Amerikës në Ukrainë, Bridget Brink, në një postim në X.

“Gjatë 5 ditëve të fundit, Rusia ka lëshuar qindra raketa dhe dronë kundër një vendi sovran. Ukraina ka nevojë për ndihmën tonë tani. Nuk ka asnjë moment për të humbur”.

Rusia ka përshkallëzuar sulmet ajrore në Kiev në ditët e fundit, duke synuar infrastrukturën kryesore pas bombardimeve fatale të Ukrainës në rajonet kufitare ruse.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.