Fjalimin e Kurtit sot nuk e duron Kushtetuta – njohësit e çështjeve juridike komentojnë sulmet e kryeministrit ndaj Prokurorisë

Tentimi i kryeministrit të Kosovës, Albin Kurti në njërën anë dhe disa deputetëve të Lëvizjes Vetëvendosje në anën tjetër që të sulmojnë kryeprokurorin e Prokurorisë Speciale, Blerim Isufajn, pas arrestimit të kryeshefit të Korporatës Energjetike të Kosovës, Ragip Krasniqit, mbi dyshimin se i njëjti ka keqpërdorur disa tenderë, një prej tyre 3.4 milionë euro, nuk mund të cilësohet si asgjë tjetër përveçse ndërhyrje në sistemin e drejtësisë po vlerësojnë njohësit e cështjeve juridike në Kosovë.

Kurti akuzoi kryeprokurorin Isufaj “për disponim politik negativ ndaj qeverisë” ndërsa deputetët e LVV-së, duke mos iu besuar dyshimeve të Prokurorisë Speciale për akuzat që i vihen në barrë ish-drejtuesit të Komitetit për Energji në LVV – “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit” – hodhën akuzat e tyre ndaj Isufaj duke aluduar se ky i fundit po “hakmerret” në shenjë pakënaqësie, meqë nuk po dekretohet si Kryeprokuror i Shtet nga presidentja e Kosovës, Vjosa Osmani.

Për avokatin dhe njëherit ish-hulumtuesin në Institutin e Kosovës për Drejtësi, Yll Zekaj, reagimet e tilla nga eksponentë të partisë në pushtet dhe sidomos nga shefi i Qeverisë janë të papranueshme, kjo pasi që pushtetet, sipas Kushtetutës, janë të ndara në mënyrë strikte pa mundësi interferimi të bartësve të pushtetit legjislativ dhe ekzekutiv në pushtetin gjyqësor.

“Një qasje e tillë e spektrit politik në raport me veprimet e sistemit të drejtësisë, paraqet ndërhyrje të drejtpërdrejt, veprime të cilat do ta dëmtojë edhe me tepër sistemin e drejtësisë e në veçanti sistemin prokurial, i cili edhe ashtu nga raportet e monitorimit vendor dhe ndërkombëtar është identifikuar si sistem i brishtë dhe lehtë i ndikueshëm nga politika dhe grupet e interesit”, ka thënë Zekaj për Albanian Post.

Prirja e pushtetarëve për të ushtruar presion ndaj Prokurorisë, sipas Zekajt, padyshim që do të shpërfaqet edhe në raporte të ndryshme ndërkombëtare për Kosovën si tendencë për ndikim në sistemin e drejtësisë.

“Mbi prezumim e pafajësisë së të arrestuarit, organet e drejtësisë duhet të jenë të lira, e të pandikueshme, që me profesionalizëm të kryejnë veprimet e tyre hetimore, duke iu garantuar të gjitha të drejtat procedurale të arrestuarve, e qe ne fund të procesit, gjykata me vendimin e saj të provojë fajësinë apo pafajësinë e të arrestuarit për veprat për të cilat dyshohen”, ka pohuar ai.

Se targetimi i prokurorëve dhe gjykatësve nga pushteti është veprim i shëmtuar i papranueshëm dhe i dëmshëm e thotë edhe Drejtori ekzekutiv i IKD-së, Ehat Miftaraj.

Qeveria e Kosovës, sipas Miftarajt, prokurorinë e Shtetit në këtë rast kryeprokurorin e Prokurorisë Speciale, Blerim Isufajn, duhet të mbajë përgjegjës e t’i kërkojë llogari në momentin kur të njëjtit nuk e luftojnë korrupsionin, e asnjëherë në të kundërtën.

“Kushtetuta e Kosovës nuk e duron një sjellje të tillë. Veprim kundër vlerave që i kërkon sundimi i ligjit dhe qeverisja e mirë”, ka shkruar Miftaraj në rrjetin e tij social në Facebook.

Çfarë ndodhi?

Prokuroria Speciale, të mërkurën, kishte njoftuar përmes një komunikate për media se ishte arrestuar drejtori i KEK-ut, Nagip Krasniqi.

Krasniqi sipas Prokurorisë, ishte arrestuar për shkak të dyshimit se ka kryer veprat penale “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit”.

Ndërsa të enjten Prokuroria në fjalë ka bërë kërkesë për caktimin e paraburgimit ndaj kryeshefit të KEK-ut.

Arrestimi i drejtorit të KEK-ut përplas pushtetin dhe opozitën

Ndonëse kryeministri i Kosovës, Albin Kurti, pranoi se arrestimi i Krasniqit është e bazuar mbi fakte, me të cilat merret sistemi i drejtësisë, i njëjti sulmoi Prokurorinë Speciale, duke thënë se kjo e fundit ishte shumë e zellshme me këtë rast, ani pse edhe në të kaluarën ka pasur keqpërdorime nga ana e kryeshefave të KEK-ut, të cilat nuk janë hetuar fare.

“Natyrisht që udhëheqja e re e KEK-ut ka deponuar me dhjetëra fakte e dëshmi materiale për keqpërdorimet që i ka gjetur aty, mirëpo zelli i Prokurorisë për t’u marrë me deponimet e fakteve e dëshmimeve për keqpërdorimet e mëhershme ka qenë zero, ndërsa zelli për t’u marrë me kryeshefin Krasniqi i cili në vitin 2022, bashkë me ekipin e vetë ja solli 107 milionë euro fitim, ishte maksimal”, kishte thënë Kurti.

Shefi i Qeverisë në veçanti kishte kritikuar figurën e kryeprokurorit të Speciales, Blerim Isufajt, i cili sipas tij nuk e ka të fituar në Gjykatë asnjë rast duke thënë se i njëjti po dëshiron të bëhet kryeprokuror i shtetit përkundër vullnetit të presidentes, kryeparlametarit dhe kryeministrit.

“Bëhet fjalë për një kryeprokuror i cili është i mirënjohur në skenën tonë publike që në rastin e vrasjes së ish-shefit të AKP-së, Dino Hasanajt e kategorizojë si vetëvrasje ndërkaq rastin e vetëvrasjes së ish-drejtorit të informimit në Kryeministri, Hamdi Sopa e shndërrojë në vrasje”.

Në anën tjetër deputetët nga opozita kanë kërkuar nga zyrtarë të Qeverisë që të japin më tepër informacione për arrestimin e tij, pasi, sipas tyre Nagip Krasniqi ka qenë zyrtar i lartë i Lëvizjes Vetëvendosje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.