Sport

Finalja e UECL, Tirana me protokoll të veçantë si në vizitën e Presidentit Bush dhe Papa Françeskut


Për herë të parë në Shqipëri do të organizohet një finale e një turneu të UEFA-s. Dhe ajo do të jetë finalja e parë e Conference League. Më 25 maj në stadiumin “Air Albania”, Roma do të përballet me Feyenoord-in.

Mediat italiane i kanë bërë jehonë lajmit se Tirana është e gjitha në dispozicion të kësaj ndeshje, duke ndjekur dhe rregulla apo protokolle të veçanta.

“Në fakt, ekziston një frikë e madhe për tifozët e shumtë italianë dhe holandezë të gatshëm për të shkuar në tokën shqiptare, shumica e tyre pa bileta, rreth 100 mijë sipas vlerësimeve të fundit”, thuhet në mediat italiane.

“Pikërisht për këtë arsye janë marrë edhe masa drastike, ku qytetarët duhet të respektojnë një sërë rregullash të rrepta”, vijojnë shkrimet

Kryebashkiaku i Tiranës, Erion Veliaj, ka pranuar se është gati të përdorë një protokoll të veçantë, siç është ai i zbatuar gjatë vizitës së Presidentit Bush apo Papa Françeskut, situata absolutisht të jashtëzakonshme.

Po këtë linjë ka ndjekur edhe ministri i Brendshëm, Bledi Çuçi, i cili u ka kërkuar qytetarëve jorezidentë të mos shkojnë në Tiranë.

Synimi është pra “zbrazja” e qytetit për ta vënë në dispozicion të “miqve” të Roterdamit dhe Romës

“Për të lehtësuar këtë situatë, kompanitë dhe bizneset vendase që nuk i përkasin sektorit të shërbimeve do të duhet të ndjekin modelin e institucioneve publike, duke i dhënë kështu punonjësve të tyre një ditë pushim”, theksojnë mediat italine.

/Albanianpost.com

Lajmet kryesore