Sport

“Finalet nuk fitohen me histori” – Mourinho komenton ndeshjen me Sevilla-n


Trajneri i Romës, Jose Mourinho, e ka komentuar finalen e Ligës së Evropës mes ekipit të tij dhe Sevilla-s që do të zhvillohet të mërkurën në mbrëmje.

“The Special One” fillimisht e komentoi faktin që Sevilla shihet si një kundërshtar me përvojë në këtë garë, të cilët e kanë fituar gjashtë herë që nga viti 2006.

“Mendoj se historia nuk i fiton ndeshjet. Kur e sheh Real Madridin në finale të Ligës së Kampionëve, apo Sevilla-n në finalen e Ligës së Evropës, mendon që do të fitojnë, por realiteti është ndryshe”, tha fillimisht Mourinho.

Mourinho më pas u pyet për faktin se mund të bëhet trajneri i parë që i fiton tre trofe evropianë të ndryshëm me tre skuadra të ndryshme.

“Nuk më intereson mua kjo gjë. Unë dua t’i gëzojë tifozët dhe t’iu dhurojë atyre një trofe. Asnjë nuk e priste që ne të mbërrinim këtu, pasi që kishte ekipe të mëdha në garë”, theksoi trajneri portugez.

“Për Romën të jetë në këtë finale do të thotë shumë. Ndaj le të fitojmë për tifozët. Unë shoh gjithmonë përpara. Kam vite në futboll dhe ndoshta ky është sekreti im, filozofia ime, ndaj dhe për mua kjo ndeshje është një finale e re”, shtoi Mouriho.

“Nuk mendoj për faktin që këtu në Hungari kam fituar 20 vite më parë me Porton, por thjesht mendoj për këtë finale”, ka thënë mes tjerash Jose Mourinho në konferencën për media.

Kujtojmë që ndeshja mes Romës dhe Sevilla-s do të zhvillohet të mërkurën me fillim nga ora 21:00.

Roma nuk ka gjasa të kualifikohet në Ligën e Kampionëve për sezonin e ardhshëm përmes Serie A, ndaj mund ta bëjë në rast se arrijnë ta fitojnë finalen.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore