Elvis Hoxha, anëtar i Kryesisë së Lëvizjes Vetëvendosje, nëpërmjet një postimi në llogarinë e tij në “Facebook”, ka reaguar ndaj deklaratave të Emisarit Special të Shteteve të Bashkuara të Amerikës, Gabriel Escobar, i cili e gjeti vetën para një konfuzioni të madh nga kursi të cilin ka vendosur ta ndjekë kryeministri Albin Kurti.
Hoxha, i cili ndryshe njihet edhe si “filozofi i Lëvizjes Vetëvendosje”, duke përdorur një shprehje me të cilën karakterizohej kritika e atëhershme e kësaj partie ndaj ish-presidentit Hashim Thaçi, vlerësoi se populli i Kosovës nuk do t’i nënshtrohet një zyrtari amerikan.
Ndryshe, tensionet janë kthyer sërish në veri të Kosovës, pas zgjedhjeve lokale të 23 prillit për katër kryetarët e komunave në veri të vendit, përkatësisht në Leposaviq, Zveçan, Zubin Potok dhe Mitrovicë e Veriut, të cilat i fituan kandidatët shqiptarë nga Lëvizja Vetëvendosje dhe Partia Demokratike e Kosovës.
Serbët lokalë janë duke protestuar që prej 29 majit në këto komuna të banuara me shumicë serbe, për të kundërshtuar hyrjen e kryetarëve të rinj shqiptarë në objektet komunale. Nga ana tjetër, komuniteti ndërkombëtar ka bërë thirrje të vazhdueshme për marrjen e hapave drejt uljes së tensioneve.
Qetësimi i situatës në pjesën veriore të Kosovës, mbajtja e zgjedhjeve të reja lokale dhe kthimi në dialogun për normalizimin e marrëdhënieve Kosovë-Serbi janë tri kërkesat e përbashkëta të Bashkimit Evropian dhe Shteteve të Bashkuara të Amerikës për dalje nga kriza.
Autoritetet e Kosovës kanë shprehur gatishmëri që t’i dëgjojë kërkesat e serbëve lokalë dhe të pajtohen për rizgjedhje në Leposaviq, Zveçan, Zubin Potok dhe Mitrovicë të Veriut, pas tensioneve të fundit atje. Por me kusht që serbët të mos i bojkotojnë ato si herën e fundit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
