“Festo me zemër, jo me armë”, policia apel qytetarëve

Policia e Kosovës, përmes një komunikate për media ka apeluar tek qytetarët që të kenë kujdes për festat e fundvitit.

Ky institucion i sigurisë, ka bërë të ditur se kanë hartuar një plan strategjikë për festat.

“Policia e Kosovës edhe këtë vit ka hartuar dhe është në zbatim të planit operativ lidhur me festat e fund-vitit dhe Vitit të Ri. Qëllimi parësor i Policisë është që përmes aktiviteteve operative dhe jo vetëm, të sigurojë ruajtjen e rendit dhe qetësisë publike në tërë territorin e vendit”.

Të njëjtit kanë sqaruar edhe qëllimin e këtij plani.

“Qëllimi i hartimit të këtij plani është që përmes shtimit të prezencës policore dhe vigjilencës së zyrtarëve policorë të arrihen patrullime të shtuara, prezencë policore më e madhe në terren, përfshirë sheshet ku pritet të ketë më shumë qytetarë si dhe prezencë policore në rrugë për të ofruar siguri në trafik”.

Ndërsa, kanë thënë se thirrjet e qytetarëve do të trajtohen me “seriozitet”.

“Policia do të trajtojë me seriozitet çdo thirrje të qytetarëve dhe do të reagojë në raste kur prezenca policore është e nevojshme duke trajtuar rastet eventuale që mund të paraqiten në këtë periudhë të festave dhe pas tyre”.

Kujdes të madhë policia ka kërkuar nga  qytetarët që të kenë me mjetet piroteknike.

“Duke apeluar tek të gjithë qytetarët që gjatë festimeve të jenë të kujdesshëm, të festojnë me zemër e jo me armë, të kujdesen sidomos te përdorimi i mjeteve piroteknike ku kërkohet monitorim nga të rriturit, po ashtu të kenë kujdes të shtuar në trafikun rrugor e të mos drejtojnë automjetet nën ndikim të alkoolit”.

Ndryshe, qytetarët e Kosovës për festat e fundvitit kanë shpenzuar rreth 29.5 milionë euro, sipas vlerësimeve të një sondazhi i cili është përfunduar nga kompania UBO Consultin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.