FBI-ja ndihmoi për zbërthimin e aplikacionit “Sky ECC”, 16 mijë referenca shqipfolëse sipas Europol-it

Policia e Shtetit do të zbulonte gjatë javës së kaluar detajet e para zyrtare pas mega-operacionit të nisur mbrëmjen e 26 korrikut në disa qytete të Shqipërisë.

I koduar “Metamorfoza” nga autoritetet, ky operacion u konsiderua prej tyre “me shkallë të lartë vështirësie”.

Policia do të ekzekutonte masat e sigurisë “Arrest në burg” për gjashtë shtetas, ndërsa kishte shpallur në kërkim nëntë shtetas të tjerë.

Por, zbërthimi i këtij grupi kriminal nuk do të ishte i mundur pa zbërthimin e “Sky ECC” nga autoritetet belge dhe holandeze.

Madje për të nxjerrë rezultatet e çkodimit të këtij aplikacioni u desh edhe ndihma operacionale e FBI-së amerikane, mëson Albanian Post nga burime që kanë dijeni për bashkëpunimin.

Të njëjtat burime konfirmojnë se ky aplikacion ka pasur rreth 16 mijë referenca shqipfolëse ose 10 për qind e totalit të aplikacionit “Sky ECC”, duke iu referuar të dhënave të sigurta nga Europol-i.

Ndërsa si abonentë me komunikim brenda territorit shqiptar variojnë deri në 3 mijë, shtoi burimi.

Në Hagë ku po kryhet zbardhja dhe verifikimi i plotë i komunikimeve gjenden edhe dy ekspertë nga Shqipëria, por pala shqiptare ka kërkuar të ketë gjashtë të tillë.

Sky ECC

Zbërthimi i aplikacionit “Sky ECC” u pasua nga një numër i madh operacionesh në verën e vitit 2022 duke arrestuar dhjetëra anëtarë të grupeve kriminale, ndërsa u kapën edhe sasi të mëdha droge dhe armësh.

Pas thyerjes së kodit të këtij aplikacioni, policia ishte në gjendje të lexonte mesazhet e koduara të dërguara nga trafikantët e dyshuar të drogës për disa vite.

Dhjetë persona disa prej të cilëve punonin për kompani portuale u arrestuan në Antwerp gjatë vitit të kaluar.

Ata dyshohet se kanë futur drogën në vend nëpërmjet portit. Një bandë e madhe droge u çmontua gjithashtu pas arrestimeve në disa vende të ndryshme.

Shtatëdhjetë përqind e hetimeve në Antwerp janë aktualisht me indicie për hetimin e Sky ECC, ndërkohë raportohet se janë gjithsej 194 dosje.

Sky ECC ishte një aplikacion i sigurt mesazhesh dikur i vlerësuar nga baronët e krimit të drogës. Por, pasi u godit nga hetuesit në vitin 2021, ajo ka njohur vetëm rënie.

Policia nga Belgjika, Franca dhe Holanda tani po shqyrton një gamë të madhe mesazhesh të dërguara brenda bandave të fshehta të kontrabandës së drogës dhe ata kanë filluar të arrestojnë personat e inkriminuar.

Sipas Sky ECC, produkti i tyre është ndërtuar mbi parimet e sigurisë zero të besimit, i cili e konsideron çdo kërkesë si shkelje dhe e verifikon atë duke përdorur shtresa sigurie për të mbrojtur informacionin e ndjeshëm.

Sky ECC kodon komunikimet përmes tuneleve private nëpërmjet rrjeteve të shpërndara dhe nivelit më të lartë të kriptimit.

Encrochat

Gjithçka lidhur me çkodimin e “Sky ECC” nisi pas zbërthimit të aplikacionit tjetër “Encrochat”, i cili u ofronte kriminelëve komunikime të gjoja të sigurta të koduara.

Agjencia evropiane e policisë Europol zbuloi gjatë muajit qershor se rrëzimi i kësaj kompanie të nëndheshme çoi në më shumë se 6 mijë e 500 arrestime dhe 900 milionë euro në asete të sekuestruara.

Sistemi kishte rreth 60 mijë përdorues kur u mbyll papritur në qershor 2020, dhe Europol zbuloi muajin pasardhës se zyrtarët e zbatimit të ligjit kishin përgjuar komunikimet e përdoruesve për muaj të tërë.

EncroChat është një kompani e telefonisë celulare që synon të sigurojë celularë të modifikuar të cilëve u janë hequr mikrofonat, kamerat dhe sistemet GPS.

Më pas pajisjet kanë të instaluar një sistem operativ të posaçëm dhe softuer mesazhesh, i cili dërgon dhe merr mesazhe të koduara.

Disa janë në gjendje të komunikojnë vetëm me telefona të tjerë në rrjet dhe kanë mundësinë që të futet një kod i cili me fshirjen e bisedave të koduara.

Me dhjetëra agjentë nga e gjithë bota po punojnë me mesazhet e gjetura në aplikacionin “Sky ECC” dhe pritet që këtë vit të ketë vërtetë zhvillime në frontin e luftës ndaj krimit dhe korrupsionit nga SPAK.

Ajo ka nisur, por fundi nuk i dihet.

A do të ketë vetëm elementë të biznesit, policisë dhe krimit mes të arrestuarve?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.