Familja e Ademajt i kërkon takim urgjent prokurorisë: S’jemi të informuar kush është prokuror i rastit

Leonard Ademaj, vëllai i 30-vjeçares, Liridona Ademajt, e cila dyshohet se është vrarë më 29 nëntor në kryeqytet, ka thënë se familja e viktimës nuk është njoftuar nga Prokuroria Themelore në Prishtinë se cili është prokurori i rastit, duke shtuar se informacionet e vetme janë raportimet e mediave.

Ai ka njoftuar nëpërmjet një postimi në “Facebook” të mërkurën se për këtë arsye, familja Ademaj i është drejtuar prokurorisë për një takim urgjent lidhur me rastin e vrasjes së 30-vjeçares të premten e 29 nëntorit në rrugën “Dalip Alshiqi” në kryeqytet, përkatësisht në fshatin Bërnicë të Prishtinës.

“Ne jemi thellësisht falenderues për punën e bërë deri më tani nga policia dhe prokuroria. Mirëpo, jemi të shqetësuar që deri më tani prokuroria nuk ka kontaktuar fare me neve. Ne ende zyrtarisht nuk jemi informuar se kush është prokuror i rastit dhe informacionet e vetme i kemi nga raportimet në media”, ka shkruar ndër të tjera Ademaj krahas dokumentit.

Gjykata Themelore në Prishtinë ka caktuar më 3 dhjetor masën e paraburgimit prej 1 muaji (30 ditë) ndaj katër të akuzuarve për vrasjen e 30-vjeçares, ndërsa autoritetet ende nuk e kanë bërë të ditur motivin e vrasjes.

Naim Murseli, bashkëshorti i viktimës dhe organizatori i vrasjes, akuzohet për veprën penale “vrasje e rëndë në bashkëkryerje”, dorasi i identifikuar nga Policia e Kosovës, Granit Plava, akuzohet për “vrasje të rëndë dhe armëmbajtje pa leje”, ndërsa pjesëtari i Forcës së Sigurisë së Kosovës (FSK), Kushtrim Kokalla, akuzohet për “marrëveshje për të kryer vrasje të rëndë”.

Tomë Dodaj, personi i katërt i cili dyshohet për vrasjen e Ademajt, akuzohet për kryerjen e veprës penale “importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve/materieve plasëse”, ndërsa në njoftimin e gjykatës, ndër të tjera, bëhej e ditur se presoni në fjalë ua ka shitur armën kryesve të krimit.

Kjo ngjarje e rëndë ka ngjallur shumë reagime, përfshirë nivelet e larta shtetërore dhe shoqërinë civile për shkak se krimi ka ndodhur pikërisht në kohën kur në Kosovë po zhvillohej fushata kundër dhunës ndaj gruas.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.