Fajon e “shqetësuar” për ndikimin rus në Serbi dhe Republika Srpska

Ministrja e Punëve të Jashtme të Sllovenisë, Tanja Fajon, ka thënë se është shqetësuar për ndikimin dhe ndërhyrjen e Federatës Ruse në Serbi dhe Republikën Srpska – entiteti serb në Bosnje e Hercegovinë.

Këto komente, Fajon i bëri në një intervistë për mediumin prestigjioz amerikan “CNN”, ku theksoi se pas luftës në Ukrainë, Rusia dëshiron që të kontrollojë edhe zonën e Ballkanit Perëndimor.

Sipas kryediplomates sllovene, Moska zyrtare “nuk do të ndalet vetëm me këtë luftë në Ukrainë”.

“Ajo që ne shohim si në Serbi ashtu edhe në Republikën Srpska janë dezinformatat, propaganda dhe ndërhyrje ruse. Dhe kjo është arsyeja pse ne duhet ta ndalojmë këtë luftë”, deklaroi Fajon.

Ajo vlerësoi se “duhet të luftojmë për një paqe të drejtë dhe të qëndrueshme për ukrainasit”.

Ndërsa, në një intervistë për mediumin slloven “Siolnet” të martën, Fajon ka potencuar se është domosdoshmëri gjeostrategjike integrimi i Ballkanit Perëndimor në BE, marrë parasysh situatën me konflikte në botë.

“Ne kemi nevojë për vendet e Ballkanit Perëndimor në BE. Kjo është gjeostrategjikisht e nevojshme. Kjo është gjithashtu e rëndësishme për sigurinë e Sllovenisë”, ka theksuar ajo.

Në prizmin e shefes së diplomacisë sllovene, integrimi i Ballkanit Perëndimor në Union evropian parashihet të ndodhë në mënyrë graduale.

“Si pjesë e këtij integrimi gradual, Ballkani Perëndimor do t’i bashkohet më së voni tregut të përbashkët të BE-së. Lufta në Ukrainë ka përshpejtuar procesin e integrimit të Ballkanit Perëndimor në BE”.

E pyetur se cili shtet po përpiqet më shumë për integrimin në BE, Fajon ka vlerësuar se Serbia dhe Bosnja e Hercegovina – për shkak të entitetit serb atje, Republika Srspka – kanë shprehur mungesë të ambicies politike në këtë proces.

“Nga ana tjetër, zhvillime pozitive ka në Shqipëri, Mal të Zi dhe Maqedoni.

Ajo, ndër të tjera, ka thënë se dëshiron që viti 2024 të jetë sa më paqësor dhe që disa nga mosmarrëveshjet ndërmjet shteteve të përfundojnë këtë vit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.